Qazaqstanda 500-ge jýyq Ózbekstan azamaty jazasyn ótep jatyr

ASTANA. QazAqparat – Senattyń jalpy otyrysynda «Qazaqstan men Ózbekstan arasyndaǵy bas bostandyǵynan aıyrýǵa sottalǵan adamdardy jazasyn odan ápi óteý úshin berý týraly shartty ratıfıkatsııalaý týraly» Zańy maquldandy, dep habarlaıdy QazAqparat tilshisi.

«Bul shart elimizdiń Konstıtýtsııasynda bekitilgen talaptardy júzege asyrýǵa baǵyttalǵan. Elimizden tys aýmaqta júrgen azamattardy qorǵaýǵa jáne olarǵa qamqorlyq jasaýǵa kepildik berilgen. 22 elmen osyndaı ekijaqty shart jasaldy, onyń 21-i ratıfıkatsııalady. Bul kelisim Qazaqstan men Ózbekstannyń bir-birine degen seniminiń belgisi. Atalǵan qujatqa qol qoıý úshin birneshe jyl kelissóz júrgizildi. Qazirgi kezde Qazaqstannyń bas bostandyǵynan aıyrý mekemelerinde 486 Ózbekstan azamaty jazasyn ótep jatyr. Al Ózbekstanda sottalǵan Qazaqstannyń 20 azamaty bar», - dedi QR Bas prokýrorynyń orynbasary Áset Shyndalıev.

Osy oraıda ol bul sharttyń áleýmettik mańyzy bar ekenin aıtty. Otbasy múshelerimen, jaqyndarymen kezdesip tursa, sottalǵan adamǵa oń yqpal etetini sózsiz. Sottalǵandardy túzetý maqsaty tek qana olardy jazalaý emes, sonymen birge tárbıelik yqpal etý, áleýmettik baılanystardy saqtaý.

Shart halyqaralyq quqyqtyń jalpyǵa birdeı tanylǵan qaǵıdattary men normalaryna, Qazaqstannyń jáne Ózbekstannyń ulttyq zańnamalaryna sáıkes ázirlengen jáne jasalǵan.

Qujat erejesine toqtalsaq, sottalǵan adamdy óz eline berý úshin onyń kelisimi qajet. Ol jazasyn óz elinde óteıtini týraly ótinish berýi tıis.

«Zań bıýdjetten qosymsha qarajat talap etpeıdi. Ony júzege asyrý ekonomıkalyq, áleýmettik jáne quqyqtyq teris saldarǵa ákep soqpaıdy», - dedi Á. Shyndalıev.

Buǵan deıin habarlanǵandaı Ózbekstan túrmelerinde 20 qazaqstandyq jazasyn ótep jatyr.