Qazaqstanda 500-den astam brıtandyq kompanııa jumys isteıdi

NUR-SULTAN. QazAqparat - Ulybrıtanııa premer-mınıstriniń saýda ýákili, baronessa Nıkolson Vınterborn eki memleket arasyndaǵy saýda baılanystaryn nyǵaıtý maqsatynda Qazaqstanda boldy, dep jazady Ulybrıtanııa bıliginiń resmı saıty.

«Premer-mınıstrdiń saýda ýákili 28 sáýir kúni altykúndik saparǵa Qazaqstanǵa ketti. Ol Qazaqstannyń Almaty, Atyraý jáne Nur-Sultan qalalarynda bolady. Bul baronessanyń Qazaqstanǵa alǵashqy sapary. Atyraý men Almaty qalasyna ol Ulybrıtanııanyń Shyǵys Eýropa men Ortalyq Azııadaǵy saýda ákili Djýdıt Sleıtermen birge barady», - dep jazylǵan saıtta.

Habarlanǵandaı, Nıkolson Atyraý oblysynyń ákimi Nurlan Noǵaevpen kezdesip, Ulybrıtanııa men Qazaqstan arasyndaǵy munaı salasyndaǵy seriktestik týraly forýmǵa qatysady.

«Almatyda baronessa qala ákimimen kezdesedi dep josparlanǵan. Sonymen qatar ol Almatyda Astana Motors kompanııasynyń Jaguar Land avtosalonynyń ashylýyna qatysady. Almatyda saýda ýákili Brıtan saýda palatasy múshelerimen kezdesýdi josparlap otyr. Al Qazaqstan astanasynda ol isker áıeldermen kezdesip, bilim salasyndaǵy ekijaqty seriktestikti nyǵaıtý maqsatynda jaýapty sheneýniktermen júzdesedi», - delingen aqparatta.

«Men Qazaqstanǵa barǵanyma qýanyshtymyn. Qazaqstan Ulybıtanııa úshin mańyzdy seriktesterdiń biri. Eki memlekettiń strategııalyq seriktestigi jyldam damyp keledi jáne bul qarym-qatynas dostyqqa, syılastyqqa negizdelgen. Sondaı-aq eki memleket arasynda jahandyq naryq ekonomıka men halyqaralyq júıe erejelerine saı keletin saýda erkindigi jaqsy jolǵa qoıylǵan», - deıdi Nıkolson.

Aıta ketý kerek, búginde Qazaqstanda bes júzden astam brıtandyq kompanııa jumys isteıdi.