Qazaqstanda 500-den astam adam para bergeni úshin sottalǵan

NUR-SULTAN. QazAqparat - Sońǵy 3 jylda elimizde para bergeni úshin 586 adam sottaldy. Bul týraly QR Sybaılas jemqorlyqqa qarsy is-qımyl agenttiginiń apparat basshysy Qýanysh Japaqov onlaın-brıfıng barysynda aıtty, dep habarlaıdy QazAqparat tilshisi.

Onyń atap ótýinshe, 2017-2019 jyldary jáne osy jyldyń 3 aıynda Sybaılas jemqorlyqqa qarsy qyzmet para berý faktisi boıynsha 915 qylmysty tirkedi. Sońǵy 3 jyldaǵy dınamıka para berýshilerge qatysty qylmystardy tirkeý faktileriniń óskendigin aıǵaqtaıdy. Naqty aıtqanda, 2017 jyly – 255, 2018 jyly – 232, 2019 jyly – 342, al osy jyldyń 3 aıynda ǵana 86 fakti tirkelip otyr.

«Para bergeni úshin 586 adam sottaldy (2017 jyly – 165, 2018 jyly – 198, 2019 jyly – 187, osy jyldyń 3 aıynda - 36). Onyń ishinde 147 adamdy bas bostandyǵynan aıyrýǵa úkim shyǵaryldy. 352 adamǵa aıyppul salynyp, 65 adamǵa qatysty bas bostandyǵyn shekteý qoldanyldy», - dedi Q. Japaqov.

Apparat basshysynyń aıtýynsha, sottalǵandar ómir boıy memlekettik qyzmette jáne jergilikti ózin-ózi basqarý organdarynda laýazym atqarý quqyǵynan aıyrylǵan.

«Taldaý kóp jaǵdaıda jeke kompanııa ókilderi para berýshi bolatyndyǵyn kórsetip otyr. Olar kásipkerlik qyzmetti qolaıly júzege asyrý nemese memlekettik satyp alý sharttary boıynsha oryndalǵan jumystardyń aktilerine kedergisiz qol qoıý máselelerin laýazymdy tulǵalardy paramen satyp alý arqyly sheshedi», - dedi ol.

Mysaly, 2019 jyly qazan aıynda «Grenada» JShS dırektory A.Gromchenko Qostanaı oblysy Áýlıekól aýdanynyń ákimi A.Qısyqovqa orta mekteptiń ǵımaratyn kúrdeli jóndeý boıynsha oryndalǵan jumystardyń aktilerin kedergisiz qabyldaý úshin 7 mln teńge somasynda para bergeni úshin bas bostandyǵynan aıyrylǵan.