Qazaqstanda 50 jasta zeınetke shyǵýǵa bola ma
ASTANA. QazAqparat - Qazaqstan azamattary 50 jasqa tolǵannan keıin zeınetkerlikke shyǵa alady.
Bul týraly búgin Úkimet úıinde ótken baspasóz máslıhatynda QR Eńbek jáne halyqty áleýmettik qorǵaý mınıstri Tamara Dúısenova málim etti, dep habarlaıdy QazAqparat.
«Eger de siz aýyr, qaýipti jumysta isteıtin bolsańyz, onda Zańǵa sáıkes, 50 jasyńyzda zeınetkerlikke shyǵýǵa múmkindigińiz bar. ıAǵnı ol ýaqytta sizdiń zeınetaqy qoryńyzdaǵy 10 paıyzdyq mindetti zeınetaqy jarnańyz ben aldaǵy ýaqyttan bastap jumys berýshiler tóleıtin 5 paıyz jarnany qosa alǵanda jınaǵyńyz, eń tómengi zeınetaqy mólsherine jetkilikti bolýy qajet. Sonda ǵana 50 jastan zeınetkerlikke shyǵýǵa bolady», - dedi ol.
Mınıstrdiń aıtýynsha, 55 jasqa tolǵan kezde azmattyń zeınetaqy qoryndaǵy jarnasy aldaǵy 18 jyl boıy eń tómeni zeınetaqy alýǵa jetkilikti bolsa, onda ol 55 jasynda-aq zeınetke shyǵa alady.
«Al qarjylaryńyz annıýtet alýǵa jetkiliksiz bolsa, onda er azamattar 63 jasta, áıelder búgingi tańǵa deıin - 58, al 2018 jyldan bastap 58,5 jasta zeınetkerlikke shyǵady», - dedi Tamara Dúısenova.
Aıta keteıik, Eńbek mınıstri búgin 2020 jylǵa qaraı Qazaqstanda kópdeńgeıli zeınetaqy júıesi qurylatyndyǵyn málim etken bolatyn.
Munan bólek, ol 2018 jyldyń 1 shildesinen zeınetkerlikke shyǵatyn áıelderdiń zeınetaqysy 2 esege ulǵaıtylatyndyǵyn aıtqan edi.
