Qazaqstanda 50 jańaratyn energııa kózi jumys istep tur - Qanat Bozymbaev

ASTANA. QazAqparat - Qazaqstanda 50 jańaratyn energııa kózi jumys istep tur. Bul jaıynda búgin Astana ekonomıkalyq forýmy aıasynda ótken «Bolashaq energııasy jáne álemdik energetıka júıesindegi Qazaqstannyń róli» atty sessııa barysynda QR Energetıka mınıstri Qanat Bozymbaev aıtty, dep habarlaıdy QazAqparat.

«Qazaqstanda jańaratyn energııa kózderin damytý baǵytyndaǵy memlekettik saıasatty belsendi júrgizý ústindemiz. Ol júıeli sharalar qabyldaýǵa baǵyttalǵan jáne Qazaqstannyń qoldanystaǵy strategııalyq múddesine saı bolýy tıis. Sońǵy jyldary jańaratyn energııa kózderi energetıkalyq keshendi damytýdyń basymdyq vektorlarynyń biri retinde qarastyrylýda. Sarapshylardyń baǵalaýynsha, Qazaqstannyń jańaratyn energııa kózderindegi energetıkalyq áleýeti barynsha zor. Máselen, Qazaqstannyń jel energetıkasynyń ǵana áleýeti jylyna 920 mlrd. kVt saǵatty quraıdy. Bul búkil elimiz tutynatyn elektr energııasynan 10 esege artyq», - dedi mınıstr.

Sonymen qatar ol Qazaqstannyń sý energetıkasynyń áleýeti 62 mlrd. kVt saǵatty quraıtyndyǵyn jáne ol qazirgi ýaqytta elimiz tutynatyn energııanyń 70 paıyzyn quraıtyndyǵyn aıtty.

«Elimizdiń ońtústik óńiriniń kún energııasy áleýetine qatysty aıtar bolsam, bul shamamen jylyna 2500-3000 kún saǵatyna teń. Bul ońtústik óńirlerimizdi álemniń kúnniń qyzýy joǵary elderimen básekeles bolýyna múmkindik beredi. Ázirshe jańaratyn energııa kózderinen alynatyn elektr energııasynyń kólemi úlken emes. Shamamen 0,9 mlrd. kVt saǵatty quraıdy jáne óndirilgen elektr energııasynyń jalpy kólemindegi jańaratyn energııa kózderiniń úlesi 1 paıyzǵa teń. Alaıda osydan úsh jyl buryn jańaratyn energııa kózderiniń úlesi nólge teń edi. 3 jyldyń ishinde Qazaqstanda 50 jańaratyn energııa kózi salynyp, jumys istep tur», - dedi Qanat Bozymbaev.