Qazaqstanda 50 mlrd tonna paıdaly mıneraldar bar
NUR-SULTAN. QazAqparat - QR Indýstrııa jáne ınfraqurylymdyq damý mınıstri Roman Sklıar qaramaǵyndaǵy vedomstvonyń aldaǵy mindetterin atady, dep habarlaıdy QazAqparat tilshisi.
«Úkimet aldynda shıkizat ındýstrııasyn uıymdastyrý jáne ony paıdalaný baǵdaryn qaıta oılastyrý, tabıǵı resýrstardy basqarý, úzdik tehnologııalardyń transferti men zańnamany jetildirý esebinen óndiristi jańartý mindeti tur», - dedi Roman Sklıar H halyqaralyq taý-metallýrgııalyq «Astana Mining & Metallurgy» kongresi kezinde.
Onyń aıtýyna qaraǵanda, resýrstyq jáne energııany tıimdi paıdalaný saıasatyn jalǵastyrý kerek.
«Qatty paıdaly qazbalardy bolashaq urpaqqa qaldyrý maqsatynda jumys júrgizilýde. Ol úshin energııany barynsha az paıdalaný arqyly paıdaly qazbalarǵa tolyqqandy monıtorıg júrgizý boıynsha jańa tehnologııalardy qoldaný kerek», - dedi mınıstr.
Vedomstvo basshysy sonymen birge elimizde jınaqtalǵan resýrstar týraly sóz qozǵady.
«Búgingi kúni taý-ken kásiporyndarynda paıdaly komponentteri joǵary 50 mlrd tonna tehnogendi mıneraldy jıyntyq bar. Ony qaıta óńdeýde kásiporyndar tehnologııany barynsha paıdalanýy kerek. Qaıta óńdeý salasyn jigerlendirý maqsatynda álemdik úzdik tájirıbelerge súıene otyryp, zańnama jetildirildi. Qorshaǵan ortany qorǵaý - ónerkásiptik ekonomıkany damytýda mańyzdy faktor. Ol úshin qazirgi tańda Qazaqstanda ekonomıkalyq ósim men jasyl ekonomıkany ushtastyra bilý kerek», - dedi Roman Sklıar.
