Qazaqstanda 50 myń AQSh dollarynan asatyn valıýtalyq operatsııalar baqylaýǵa alynady
ASTANA. KAZINFORM – Qazaqstanda 50 myń AQSh dollarynan joǵary somaǵa jasalatyn valıýtalyq operatsııalar boıynsha derekter memlekettik kirister organdary men Ulttyq bank arasynda almasyp otyrady.
Atap aıtqanda Qarjy mınıstrligi «Memlekettik kirister organdary men Qazaqstan Respýblıkasynyń Ulttyq Bankiniń valıýtalyq operatsııalary boıynsha aqparat pen málimetter berý jónindegi ózara is-qımyl qaǵıdalaryn belgileý týraly» buıryq jobasyn ázirledi.
– 50 000 AQSh dollarynan asatyn valıýtalyq operatsııalar, sonyń ishinde taýarsyz mámileler, rezıdent emesterdiń tabystary jáne «Astana» halyqaralyq qarjy ortalyǵynyń qatysýshylaryna qatysty operatsııalar boıynsha aqparat almasý tártibi kózdelgen, – delingen qujatta.
Vedomstvonyń málimetinshe, jobanyń maqsaty Ulttyq bank pen memlekettik kirister organdary arasyndaǵy aqparat almasýdyń biryńǵaı tetigin engizý.
– Atalǵan bastama memlekettik kirister organdarynyń iri valıýtalyq operatsııalar jónindegi málimetterge der kezinde qol jetkizýin qamtamasyz etedi, kapıtaldyń zańsyz shyǵarylýyn boldyrmaýǵa jáne jalǵan mámilelerdiń aldyn alýǵa múmkindik beredi, – delingen mınıstrlik habarlamasynda.
Qujat «Ashyq NQA» portalynda 28 qazanǵa deıin qoǵamdyq talqylaýǵa shyǵaryldy.
Aıta keteıik, QR Ulttyq bank tóraǵasy Tımýr Súleımenov sheteldik valıýtanyń baǵamy Qazaqstandaǵy eń basty qarjy tetigi emes ekenin aıtqan bolatyn.