Qazaqstanda 50-den astam aqparattyq júıemen biriktirilgen medıtsınalyq derekter qoımasy quryldy
ASTANA. KAZINFORM- Qazaqstanda 12 medıtsınalyq aqparattyq júıeden, tizilimder men anyqtamalyqtardan aqparatty biriktiretin Smart Data Healthcare medıtsınalyq derekteriniń biryńǵaı qoımasy quryldy.
QR Densaýlyq saqtaý mınıstrligi baspasóz qyzmetiniń habarlaýynsha, júıe memlekettik organdardyń 50-den astam aqparattyq júıesimen ıntegratsııalanǵan.
Densaýlyq saqtaý mınıstri Aqmaral Álnazarova densaýlyq saqtaýdy tsıfrlandyrý máseleleri jónindegi keńeste Memleket basshysynyń tapsyrmasyna sáıkes medıtsınalyq derekterdiń biryńǵaı qoımasy qurylǵanyn aıtty.
- Oǵan barlyq medıtsınalyq derekter kóshirilip, jınaqtaldy. Medıtsınalyq kómekti tóleý úshin derekterdi tsıfrlyq baqylaý formattyq-logıkalyq tekserýler sanyn arttyrý arqyly kúsheıtildi: 2024 jylǵy 80 tekserýden bıyl 486 tekserýge deıin jetkizildi. Osylaısha, Biryńǵaı qoımaǵa tek tekserilgen derekter túsedi. Ol medıtsınalyq aqparattyń, onyń ishinde taldaý júrgizý jáne basqarýshylyq sheshimder qabyldaý úshin biryńǵaı ári senimdi kózine aınalady, – dep atap ótti mınıstr.
Formattyq-logıkalyq baqylaý medıtsınalyq aqparatty biryńǵaı qoımaǵa engizgenge deıin sáıkessizdikter men qatelerdi avtomatty túrde anyqtaýǵa múmkindik beredi. Eger tekserýlerdiń keminde bireýi ótpese, jazba sebebi kórsetile otyryp, medıtsınalyq uıymǵa avtomatty túrde qaıtarylady.
Tsıfrlyq baqylaý ekonomıkalyq tıimdilik te berip otyr. Medıtsınalyq júıeden ózektiligin joǵaltqan shamamen 400 myń patsıenttiń kartasy shyǵaryldy. Olarmen 1,4 mln retsept baılanysty bolǵan. Bul 31 mlrd teńge kólemindegi yqtımal shyǵystardyń aldyn alýǵa múmkindik berdi.
Sonymen qatar medıtsınalyq qyzmetterdi negizsiz tutyný 7,1%-ǵa nemese shamamen 7 mlrd teńgege tómendedi. Bul rette qatelerdi anyqtaý tıimdiligi 3,5 esege artty.
Smart Data Healthcare medıtsınalyq aqparatty saqtaý fýnktsııasymen ǵana shektelmeıdi. Júıe densaýlyq saqtaýdyń biryńǵaı tsıfrlyq kontýryn qalyptastyrady, derekterdiń sapasyn baqylaýdy qamtamasyz etedi jáne olardy josparlaý, taldaý, medıtsınalyq kómekti tóleý jáne basqarýshylyq sheshimder qabyldaý úshin paıdalanýǵa múmkindik beredi.
Biryńǵaı qoımany qurý kezinde densaýlyq saqtaýdy tsıfrlandyrý salasyndaǵy halyqaralyq tájirıbe, onyń ishinde Danııa, Estonııa, Sıngapýr jáne Túrkııanyń tájirıbesi eskerildi.
Osyǵan deıin medıtsınalyq aqparattyq júıelerdi biriktirý 31 mlrd teńge shyǵynnyń aldyn alýǵa múmkindik bergeni týraly jazdyq.
