Qazaqstanda 50-60 jastaǵy 325 myń áıeldiń tabysy joq - Eńbek mınıstrligi

ASTANA. QazAqparat – Qazaqstanda 50-60 jastaǵy 325 myń áıeldiń tabysy joq. Bul týraly Eńbek jáne halyqty áleýmettik qorǵaý mınıstri Tamara Dúısenova QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń kezekti otyrysynda aıtty, dep habarlaıdy QazAqparat.

Mınıstr zeınetkerlik jasqa deıingi áıelderdi jumyspen qamtý máselelerine erekshe kóńil bólinetinin atap ótti. Qazaqstanda 50-den 60 jasqa deıingi 1 mln jýyq áıel bar, onyń ishinde 325 myńynyń tabysy joq, bul bolashaqta zeınetaqy tólemderiniń tómen deńgeıine tikeleı áser etedi.

«Bolashaq táýekelder sózsiz áleýmettik sıpatqa ıe bolady, osyǵan baılanysty 2022 jyldan bastap zeınetkerlik jasqa deıingi adamdar úshin «Kúmis jas» jobasy alǵash ret iske qosyldy. Ótken jyly joba aıasynda 3 myńnan astam adam jumysqa ornalastyryldy, olardyń jartysy – áıel. Jobaǵa qatysýshylar kontıngentin keńeıtý úshin bıyl biz qatysý jasyn qaıta qaradyq. Eger ótken jyly jobaǵa 59 jastan asqan adamdar ǵana qatysa alsa, bıyl jas shegi 50 jasqa deıin tómendetildi, bul 9,4 myń egde jastaǵy azamatty qamtýǵa múmkindik berdi, onyń 54%-y – 50 jastan asqan áıel.

Jumys oryndaryn jumys berýshiler usynady, qatysýshylar biliktilikterine qaraı óz betinshe tańdaýǵa quqyly», - dedi Tamara Dúısenova.

Sonymen qatar, áıelderdi ulttyq jobalar sheńberinde jumysqa ornalastyrý týraly habardar etti.

«Jumyspen qamtýǵa járdemdesýdiń taǵy bir belsendi sharasy – bıznes-ıdeıalardy iske asyrýǵa memlekettik granttar berý. Naýryzda granttardy bólýdiń I kezeńi ótti, onyń nátıjeleri boıynsha memlekettik granttardy 2 564 adam aldy, grant alýshylardyń 62,4%-y áıel boldy.

Respýblıka boıynsha grant alýshylardyń basym kópshiligi kóp balaly otbasylar qatarynan 1 384 stıpendıat (onyń ishinde 917 áıel), múgedektigi bar adamdar arasynan 494 adam (168 áıel), múgedektigi bar balalardyń qamqorshylar tiziminen 306 adam (239 áıel), ataýly áleýmettik kómek alatyn 176 adam (127 áıel)», - dep habarlady Tamara Dúısenova.

Sondaı-aq, mınıstr Memleket basshysynyń tapsyrmasyn oryndaý aıasynda bıyldan bastap engizilgen jastardyń jyldyq 2,5% kásipkerlik bastamalaryn qoldaý úshin jeńildetilgen mıkrokredıt berý týraly egjeı-tegjeıli aıtyp berdi.

«2023 jylǵa arnalǵan respýblıkalyq bıýdjetten 5 796 jas kásipkerge 5 mln teńgeden mıkrokredıt berý úshin 29 mlrd teńge qarastyrylǵan. Mıkrokredıtter Agrokredıttik korporatsııa arqyly beriledi. Búgingi tańda jalpy somasy 5,3 mlrd teńgege 1 118 ótinim kelip tústi, onyń ishinde komıssııa jalpy somasy 482,5 mln teńgege 102 ótinimdi maquldady. Budan basqa, 420 ótinim Agrokredıttik korporatsııanyń óńirlik fılıaldarynda qaralyp jatyr, 149 ótinim pysyqtaýǵa qaıtaryldy, 448 ótinim óńirlik komıssııalardyń qaraýynda bolsa, 26 ótinim boıynsha komıssııalar naqty bıznes-josparlardyń bolmaýyna baılanysty mıkrokredıtter berýden bas tartý týraly sheshim qabyldady», - dep habarlady Tamara Dúısenova.