Qazaqstanda 5 myńnan astam bala polıtsııa esebinde tur

NUR-SULTAN. QazAqparat – Sońǵy jeti jylda elimizde jasóspirimder qylmysy 64%-ǵa qysqardy. Bul týraly Іshki ister mınıstrligi málimdedi, dep habarlaıdy QazAqparat tilshisi.

«Ótken jyly kámeletke tolmaǵandar arasynda qylmys úshten birge qysqardy. Olar jasaǵan urlyq sany 39%-ǵa, tonaý 54%-ǵa, qaraqshylyq 79%-ǵa jáne buzaqylyq 25%-ǵa azaıdy. Ádettegideı, kámeletke tolmaǵandardyń qylmys jasaýynyń basty sebebi – balalarǵa tıisti baqylaýdyń bolmaýy. Jyl saıyn polıtsııa organdaryna 100 myńǵa jýyq bala jetkiziledi. Olardyń kópshiligi túngi ýaqytta turǵyn úıden tys jáne oıyn-saýyq mekemelerinde zańdy ókildersiz júrgen jasóspirimder bolǵan», - dedi QR ІІM Ákimshilik polıtsııa komıteti tóraǵasynyń orynbasary Alekseı Mılıýk ІІM-de ótken onlaın-brıfıng barysynda.

Onyń aıtýynsha, 2020 jyly 65 myńnan astam ata-ana ákimshilik jaýapkershilikke tartyldy, olar balalaryna túngi ýaqytta kóshede jáne oıyn-saýyq oryndarynda júrýge jol bergen.

«Sonymen birge, kafeler men meıramhanalardyń 800-den astam ıesi osyndaı kámeletke tolmaǵandardyń júrgeni úshin ákimshilik jaýapkershilikke tartyldy. 4 myńnan astam jasóspirimdi ata-analaryna berý múmkin bolmaǵandyqtan, kámeletke tolmaǵandardy qaraýsyz qaldyrǵany úshin beıimdeý ortalyqtaryna jiberildi. Búginde polıtsııa esebinde quqyqbuzýshylyq jasaýǵa beıim 5 myńnan astam kámeletke tolmaǵan bala tur. Olarmen jeke-profılaktıkalyq jumystar júrgizilýde», - dedi A. Mılıýk.