Qazaqstanda 5 myńnan asa kásiporynǵa 67 myń jumysshy qajet - «Atameken» palatasy

ASTANA. QazAqparat - Densaýlyq saqtaý jáne áleýmettik damý mınıstrligimen birge 5 myńnan asa kásiporynǵa zertteý júrgizgen «Atameken» ulttyq kásipkerler palatasy osy uıymdarǵa 67 myń maman qajet ekenin anyqtaǵan. Bul týraly búgin Ortalyq kommýnıkatsııalar qyzmetinde ótken brıfıngte «Atameken» ulttyq káipkerler palatasy tóraǵasynyń orynbasary Nurjan Altaev málim etti.

«Elimiz boıynsha ındýstrııalandyrý isi qarqyn alǵan. Ártúrli salada ashylyp jatqan kásiporyndar jańa tehnologııalar men jańa qurylǵylardy ákelýde. Elimiz ınvestorlardy kóptep tartyp jatqanymen, kadr daıarlaý isi áli de aqsap tur, ıaǵnı, ındýstrııalandyrýdyń artynan erip úlgermeı jatyrmyz. Jańa qurylǵylardy erkin meńgergen maman tabý qıyn. Bilikti maman tapshylyǵy el ekonomıkasynyń budan da jaqsy damýyn tejep otyrǵan faktorlardyń biri»,-deıdi N.Altaev. Kásipkerlerge qoldaý kórsetetin ulttyq palata naqty statıstıka alý úshin Densaýlyq saqtaý jáne áleýmettik damý mınıstrligimen birge 5500 kásiporynda saýalnama júrgizipi. Zertteý nátıjesi osy 5500 kásiporyn 67 733 adamǵa jumys usynýǵa daıyn ekenin kórsetken. «Ulttyq kásipkerler palatasy Densaýlyq saqtaý jáne áleýmettik damý mınıstrligimen birge Qazaqstan boıynsha 5500 kásiporynda saýalnama júrgizdi. Biz osy kásiporyndarǵa 67733 maman qajet ekenin anyqtadyq»,-deıdi N.Altaev.