Qazaqstanda 5 myńǵa jýyq aýyl keń jolaqty ınternetke qosylǵan

ASTANA. QazAqparat – Qazaqstanda 6 290 aýyldyq eldi meken bar, onyń 4 858-i keń jolaqty mobıldi ınternetke qosylǵan. Bul týraly QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın aıtty, dep habarlaıdy QazAqparat tilshisi.

«Mańyzdy strategııalyq mindetterdiń biri – baılanys salasyn damytý. Búginde Qazaqstanda 6 290 aýyldyq eldi meken bar, onyń 4 858-i keń jolaqty mobıldi ınternetke qosylǵan. 3G ornyna 4-shi býyndy baılanyspen qamtý jumysy júrip jatyr. Sondaı-aq tehnologııalyq turǵyda eskirgen ADSL joǵary jyldamdyqty tehnologııaǵa aýystyrylady», - dedi Baǵdat Mýsın mınıstrliktiń keńeıtilgen alqa otyrysynda.

Mınıstrdiń aıtýynsha, búkil álemde oıyn-saýyq kontentiniń ınternet-trafıgin paıdalaný qarqyny artyp otyr.

Sondyqtan da baılanys ınfraqurylymyna júkteme artyp keledi.

«Halyqaralyq tájirıbe kórsetkendeı, damyǵan elder baılanys ınfraqurylymyna belsendi ınvestıtsııa salyp jatyr. Biz ótkizgen 5G boıynsha alǵashqy aýktsıon telekommýnıkatsııa naryǵynyń ozyq óteletin jobalarǵa ınvestıtsııa salýǵa úlken qyzyǵýshylyǵy baryn kórsetti», - dep atap ótti Baǵdat Mýsın.