Qazaqstanda 5 myń maman aýylda jumys isteýden bas tartty
ASTANA. QazAqparat Qazaqstanda «Dıplommen aýylǵa» baǵdarlamasy aıasynda eldi mekenderge jiberilgen 5 myń maman kelisimshartty buzdy. Bul týraly búgin Ortalyq kommýnıkatsııalar qyzmetindegi brıfıngte QR Ulttyq ekonomıka mınıstrligi Ekonomıka ınfraqurylymdaryn damytý departamentiniń dırektory Ulan Jazylbek málim etti.
«Dıplommen aýylǵa» jobasy erejesiniń ońtaıly sharttaryna qaramastan birqatar problemaly máseleler bar. Bekitilgen erejege sáıkes ákimshi, maman jáne senimdi agent arasynda kelisim jasalady. Oǵan sáıkes, maman jumys orny boıynsha atalǵan eldi mekende keminde úsh jyl jumys isteýi tıis. Degenmen, eńbek qatynastaryn merziminen buryn buzý derekteri bar. Bul rette kelisimge sáıkes, maman ózine kórsetilgen áleýmettik qoldaýdy, kóterme járdemaqy men bıýdjettik nesıeni tolyq kólemde qaıtarýǵa mindetti», - dedi ol.
U.Jazylbek BAQ ókilderiniń saýalyna jaýap bere kele baǵdarlama júzege asyrlǵan sátten beri 5 myń maman kelisimshartty buzǵanyn aıtty. Olar bıýdjetke qaıtarylýy tıis 1 mlrd. teńgeden astam qarjynyń 911 mln. teńgesin ótedi.
«Mindettemeniń oryndalmaýynyń negizgi sebebi áleýmettik-otbasylyq jaǵdaıdyń ózgerýi, basqa eldi mekenge kóship barý, jumys ornynan bosaýy bolyp otyr», - dedi ol.
Buǵan qaramastan atalǵan jobany júzege asyrýdyń nátıjesinde naqty nátıjelerge de qol jetkizildi. Aýyldyq jerlerdegi kadrlar sany artty.
«Máselen, joba júzege asyryla bastaǵannan aýyldyq jerlerge 46 631 maman tartylyp, olar jalpy somasy 9,3 mlrd. teńge kóterme qarjy aldy. Al 19 263 mamanǵa úı satyp alýǵa nemese salýǵa 43,6 mlrd. teńge kóleminde bıýdjettik qarjy bólindi», - dedi departament basshysy.
Onyń derekterine sáıkes, aýyldyq jerlerge barǵan mamandardyń basym bóligi bilim (33 400 adam), densaýlyq saqtaý (9 813), mádenıet (1 289), sport (616), áleýmettik qamtamasyz etý (403) jáne agroónerkásip kesheni salalarynda (1110) jumys isteıdi.
«Aǵymdaǵy jyly joba aıasynda aýyldarǵa 5850 maman tartý úshin bıýdjetten kóterme járdemaqyǵa 2,1 mlrd. teńge, 2725 mamanǵa úı satyp alýǵa bıýdjettik nesıe usyný úshin 8,6 mlrd. teńge qarastyryldy. Aldaǵy úshjyldyq kezeńge arnalǵan respýblıkalyq bıýdjetti qalyptastyrý aıasynda 2017 jyly 3232 mamanǵa baspana satyp alý úshin bıýdjettik nesıe berýge 11 mlrd. bıýdjet qarjysy kózdelgen», - dedi U.Jazylbek.
