Qazaqstanda 5 kún ishinde izdeýde júrgen 100 adam ustaldy
NUR-SULTAN. QazAqparat - QR ІІM Ákimshilik polıtsııa komıtetiniń tóraǵasy Maqsat Baıbolov 1-5 maýsym kúnderi ótken «Quqyqtyq tártip» jedel aldyn alý sharasyn qorytyndylady, dep habarlaıdy QazAqparat tilshisi.
«Osy jyldyń 1-5 maýsym kúnderi jol qaýipsizdigin qamtamasyz etip, qoǵamdyq oryndardaǵy qylmystardyń aldyn alý, jalpy quqyqtyq tártipti qamtamasyz etý úshin elimizde «Quqyqtyq tártip» jedel aldyn alý sharasy ótkizildi. Oǵan 18 myń polıtsııa qyzmetkeri qatysty. Іs-sharany qorytyndylasaq, elimiz boıynsha 2 myńnan astam qylmystyń beti ashyldy. Onyń 642-i erterekte jasalǵan. Odan bólek, 5 kisi óltirý, 47 kisi tonaý, 58 ákimshilik quqyq buzý faktisi anyqtaldy. Sondaı-aq, buryn izdeýde júrgen 100 adam ustaldy», - dedi Maqsat Baıbolov.
Komıtet tóraǵasynyń deregine súıensek, 158 esirtki zatyn zańsyz saqtaý oqıǵasy tirkelip, nátıjesinde 44,7 keli esirtki tárkilengen. Sonymen qatar, 135 dana atys qarýy tárkilengen.
«Zańsyz qarýdy tárkileýge qatysty sharalar júrgizilip jatyr. Almaty oblysynda ýchaskelik polıtsııa qyzmetkeri turǵyndardyń birinen 20 patronymen birge AK avtomatyn tárkiledi. Quqyq buzýshynyń ústinen tergeý bastaldy. Jalpy, osy sekildi jedel aldyn alý sharasy kezinde qalalar men eldimeken kóshelerinde, qoǵamdyq oryndarda jedel jaǵdaıdyń jaqsarǵany baıqalady»», - dedi Maqsat Baıbolov.
