Qazaqstanda 5 gaz qubyry jáne 1 gaz taratý stansasy salynady - mınıstr

ASTANA. QazAqparat - Elimizdiń aýmaǵynda 2 magıstraldy gaz qubyry, 3 gaz qubyry jáne 1 avtomattandyrylǵan gaz taratý stansasy salynady. Bul týraly búgin Úkimet otyrysynda QR Energetıka mınıstri Qanat Bozymbaev aıtty, dep habarlaıdy QazAqparat tilshisi.

«2 magıstraldy gaz qubyryn salýǵa 60 mlrd teńge bólý usynylyp otyr. Biri - Aqtóbe oblysy 30 mlrd teńge, al, ekinshisi - Mańǵystaý óńiri. Ol jaqqa da shamamen 30 mlrd teńge qarastyrý qajet. Jobalardy júzege asyrý nátıjesinde Mańǵystaý jáne Aqtóbe oblystarynda gazben jabdyqtaý júıesiniń senimdiligi ulǵaıady. Aıta ketý kerek, bir Mańǵystaý oblysynyń ózinde 130 myń turǵyn qosymsha gazben qamtylady», - dedi ol.

Sonymen qatar mınıstr 3 gaz qubyryn jáne bir avtomattandyrylǵan gaz taratý stansasyn salýǵa qarjy bólýdi usyndy. Onyń jalpy somasy 12,3 mlrd teńgeni quraıdy.

«Sonyń ishinde Jambyl oblysynda 3 jobanyń jalpy somasy 8,4 mlrd teńgeni quraıdy. Jobalar júzege asqannan keıin 175 myń adam gazben qamtylady. Qostanaı oblysynda - 1 joba. Onyń quny 3,9 mlrd teńge. Nátıjesinde 9 myń adam gazben qamtylady. Jalpy aıtqanda, bul jobalar iske assa, osy óńirdegi 184 myń halyq gazben qamtylady», - dedi mınıstr.

Q.Bozymbaev Batys Qazaqstan oblysynyń Terekti aýdanynda gaz taratý jelilerin salýǵa 1,6 mlrd teńge qajet ekendigin aıtty. Bul joba 10 myń adamdy kógildir otynmen qamtymaq.