Qazaqstanda 5,7 mln adam sportpen júıeli túrde shuǵyldanady - mınıstr
«Búgingi tańda dene shynyqtyrý jáne sportpen júıeli túrde shuǵyldanatyndar sanynyń turaqty ósý úrdisi baıqalady. 2019 jyldyń qorytyndysy boıynsha olardyń sany 5,7 mln adamdy nemese 30,6 paıyzdy qurady. Bul rette Qazaqstannyń álemniń damyǵan 30 eliniń qataryna kirýin qamtamasyz etý úshin dene shynyqtyrý jáne sportpen júıeli túrde aınalysatyn adamdardyń sanyn 2025 jylǵa qaraı 35 paıyzǵa deıin arttyrý sharalaryn qabyldaýymyz qajet. Sebebi buqaralyq sport mıllıondaǵan adamdarǵa olardyń fızıkalyq qasıetteri men dene múmkindikterin jaqsartýǵa, densaýlyǵyn nyǵaıtyp, ómirlerin uzartýǵa múmkindik beredi», - dedi A. Raıymqulova Parlament Májilisindegi Úkimet saǵatynda.
Onyń sózine qaraǵanda, salaýatty ómir saltyn nasıhattaý men buqaralyq sportty damytýdyń aıasynda 2019 jyly jalpy sany 6,8 mln adamdy qamtyǵan 53 myń is-shara ótkizildi.
Budan buryn habarlanǵandaı, Májilistegi úkimet saǵatynda depýtat Gúlmıra Isımbaeva halqynyń 60 paıyzǵa jýyǵy sportpen aınalysatyn AQSh, Japonııa, Kanada sııaqty eldermen jáne Eýropa elderimen, halqynyń 55 paıyzynyń sportpen shuǵyldanatyn Reseımen salystyrǵanda, Qazaqstannyń kórsetkishi tómen deńgeıde ekenin atap ótti.