Qazaqstanda 490 mln teńgelik jalǵan memlekettik satyp alý shemasy áshkerelendi
ASTANA. KAZINFORM — QMA Almaty qalasy boıynsha departamenti memlekettik satyp alý salasyndaǵy alaıaqtyq faktisi boıynsha tergep-tekserýdi aıaqtady.
Tergeý amaldaryna saı, «KazStroıOpyt LTD» JShS basshysy konsaltıngtik qyzmet kórsetý jeleýimen kommertsııalyq uıymdar úshin qurylys jumystary tájirıbesin jasandy túrde qalyptastyrý shemasyn uıymdastyrǵan.
«Elektrondyq depozıtarıı» júıesine oryndalǵan jumystar men nysandardy paıdalanýǵa berý týraly jalǵan aktiler engizilip otyrǵan. Bul klıent-kompanııalarǵa memlekettik satyp alýǵa qatysý kezinde negizsiz artyqshylyqtar bergen.
Shema áleýmettik jeliler men ınternet-platformalar arqyly belsendi túrde jarnamalanǵan.
Qylmystyq top quramyna 11 adam kirgen. Sonymen qatar, Shymkent qalasynyń Sáýlet, qala qurylysy jáne jer qatynastary basqarmasynyń laýazymdy tulǵalaryna jalǵan jumys tájirıbesin rastaǵany úshin zańsyz syıaqy jetkizip otyrǵan deldaldar anyqtaldy.
— Qylmystyq kiristerdi zańdastyrý úshin baqylaýdaǵy zańdy tulǵalar paıdalanylyp, olar arqyly aqsha qarajaty jınaqtalyp, qolma-qol aqshaǵa aınaldyrylǵan. Qylmystyq tabys kólemi 490 mln teńgeden asty. Tergep-tekserý barysynda jalǵan jumys tájirıbesin alǵan jáne memlekettik satyp alýǵa qatysqan 56 kompanııa anyqtaldy. Tekserý júrgizý úshin materıaldar ýákiletti organdarǵa joldandy. Úsh kúdikti qamaýǵa alyndy, taǵy segiz tulǵaǵa qatysty eshqaıda ketpeý jáne tıisti minez-qulyq týraly qolhat túrindegi bultartpaý sharasy qoldanyldy. Qylmystyq is sotqa joldandy, — dedi QMA resmı ókili Ernar Taıjan.
Aıta ketý qajet, mundaı qylmystar adal emes kompanııalarǵa memlekettik kelisimsharttarǵa qol jetkizýge múmkindik beredi. Bul sapasyz jobalardyń júzege asý táýekelin arttyryp, adal bıznes sýbektilerin teń emes jaǵdaıǵa qoıady.
Osydan buryn kvazımemlekettik sektordaǵy memlekettik satyp alý erejelerine ózgeris engizilgenin jazdyq.
