Qazaqstanda 490 myńnan astam ótinish 1-synypqa onlaın berildi
ASTANA. KAZINFORM – Qazaqstanda jańartylǵan Ulttyq bilim berý derekter qory arqyly 1-synypqa qabyldaýǵa 490 myńnan astam ótinish onlaın rejımde berildi, dep habarlaıdy Úkimettiń baspasóz qyzmeti.
Premer-mınıstrdiń birinshi orynbasary Nurlybek Nálibaev Ulttyq bilim berý derekter qoryn jańǵyrtý máseleleri boıynsha keńes ótkizdi.
Jıynda Oqý-aǵartý mınıstri men «Qazaqtelekom» AQ basqarma tóraǵasynyń Ulttyq bilim berý derekter qoryn jańǵyrtý barysy jáne onyń negizinde Ulttyq bilim berý platformasyn damytý jónindegi atqarylyp jatqan jumystar týraly esepteri tyńdaldy.
Sondaı-aq Shymkent qalasy, Túrkistan, Aqtóbe jáne Almaty oblystary ákimderiniń orynbasarlary óńirlerdegi bilim berý uıymdaryn tsıfrlandyrý boıynsha atqarylyp jatqan jumystar týraly baıandady.
Jańartylǵan júıe arqyly 1-synypqa qabyldaýǵa 490 myńnan astam ótinish onlaın rejımde berilgen. Sonymen qatar tehnıkalyq, orta bilimnen keıingi jáne kásiptik bilim berý uıymdaryna qabyldaý úderisi tolyq avtomattandyrylǵan. Nátıjesinde kolledjderge 220 myńnan astam talapker oqýǵa tústi.
– Ulttyq bilim berý platformasyn engizý halyqqa bilim berý salasyndaǵy memlekettik qyzmetterdi avtomattandyrýdy qamtamasyz etýmen qatar, bıýdjet qarajatyn edáýir únemdeýge, únemdelgen qarajatty bilim berý salasyndaǵy basqa da qajettilikterge baǵyttaýǵa múmkindik beredi, – dedi Nurlybek Nálibaev.
Aıta keteıik, el mektepterinde 5000-nan astam muǵalim jetispeıdi.
