Qazaqstanda 480 kásiptik standart ázirlendi
NUR-SULTAN. QazAqparat - Qazaqstanda 480 kásiptik standart ázirlendi. Bul týraly búgin QR Eńbek jáne halyqtyq áleýmettik qorǵaý mınıstri Birjan Nurymbetov aıtty, dep habarlaıdy QazAqparat tilshisi.
«35 salalyq baǵytqa júrgizilgen saraptamanyń qorytyndysy boıynsha 6106 kásip anyqtaldy. Al 480 kásiptik standartty ázirleý arqyly 2784 kásipti jabý josparlanyp otyr»,- dedi mınıstr QR Premer-Mınıstri Asqar Mamınniń tóraǵalyǵymen ótip jatqan Kásiptik standarttar ázirleý máseleleri jónindegi ulttyq keńes otyrysynda.
Onyń atap ótýinshe, 2018 jyly josparlanǵan 550 kásiptik standarttyń 70-i bekitilgen. Bıyl mınıstrlik 36 salalyq biliktilik jáne 35 salalyq baǵyt boıynsha 480 kásiptik standart ázirleý kelisimshartyn jasasqan. Osyǵan oraı «Eńbek resýrstaryn damytý ortalyǵy» AQ bazasynda jobalyq keńse qurylǵan. Munan bólek, 11 memlekettik organnyń janynda vıtse-mınıstrlerdiń jetekshiligimen jobalyq toptar jumys isteıdi. Olardyń quramyna salalyq qaýymdastyqtardyń, Ulttyq palatanyń, jetekshi salalyq kásiporyndardyń, bilim ordalarynyń ókilderi kiredi.
«Kásiptik standart ázirleý sapasyna baqylaý qamtamasyz etildi. 4 jeltoqsandaǵy jaǵdaıǵa sáıkes, 36 salalyq biliktilik shegi bekitilip, 480 kásiptik standart ázirlendi. 391 kásiptik standart Ulttyq palatanyń bekitýine tústi», - dedi B.Nurymbetov.
