Qazaqstanda 48 ınsýlt ortalyǵyn ashý josparlanýda
ASTANA. 8 aqpan. QazAqparat - «Salamatty Qazaqstan» Memlekettik densaýlyq saqtaýdy damytý baǵdarlamasynyń aıasynda 2011 jyly halyqtyń ómir súrý jasyn uzartý boıynsha aýqymdy sharalar qolǵa alyndy, dep habarlady Pm.kz saıtyna bergen arnaıy suhbatynda QR Densaýlyq saqtaý mınıstrligi Medıtsınalyq kómek kórsetýdi uıymdastyrý departamentiniń dırektory Ajar Tóleǵalıeva.
Ótken jyly QR Densaýlyq saqtaý mınıstrligi qan aınalym júıesi aýrýlarynan ólim-jitim sanyn tómendetip, ana men bala densaýlyǵyn qorǵaýǵa baǵyttalǵan birqatar sharalardy júzege asyrdy.
«Osy jumystyń aıasynda ana men bala óliminiń kórsetkishteri aıtarlyqtaı dárejede tómendedi», - dep atap ótti Ajar Tóleǵalıeva.
Sonymen qatar, 2012 jyly ınsýlt saldarymen kúresýge qarsy jumystar atqarylatyny atalyp ótildi.
«Halyqtyń qaıtys bolýy men múgedektikke shaldyǵýyn tómendetý maqsatynda búkil el boıynsha 48 ınsýlt ortalyǵy qurylmaq», - dep tolyqtyrdy ol.
Aǵymdaǵy jyly «Salamatty Qazaqstan» baǵdarlamasynyń aıasynda bastalǵan barlyq is-sharalar jalǵasyn tabady.
«Memlekettik baǵdarlamany júzege asyrýdyń nátıjesinde biz qazaqstandyqtardyń ómir súrý uzaqtyǵyn 70 jasqa deıin jetkizemiz», - dep túıindedi Departament dırektory.
