Qazaqstanda 4,7 mlrd tonnaǵa jýyq shartty otyny bar jerlerge geologııalyq barlaý jobasy jasalǵan
ASTANA. KAZINFORM — «QazMunaıGaz» UK» AQ kómirsýtekterdiń shoǵyrlaný jaǵdaılary men qozǵalý joldaryn anyqtaý úshin bes negizgi munaı-gaz basseıni boıynsha basseındik modeldeý jumystaryn júrgizdi. Bul týraly Úkimet otyrysynda kompanııa basqarma tóraǵasy Ashat Hasenov málimdedi.
Onyń aıtýynsha, kómirsýtekterdi izdeý protsesi joǵary táýekelmen sıpattalatyn jáne keshendi ǵylymı-tehnıkalyq sheshimderdi talap etetin kúrdeli mindet.
— Osy tásilderdiń arqasynda perspektıvaly ýchaskelerdi boljaý dáldigi artyp otyr. Júrgizilgen zertteýler nátıjesinde 22 geologııalyq barlaý jobasyn qamtıtyn portfel qalyptastyryldy. Onyń jıyntyq geologııalyq resýrstyq bazasy shamamen 4,7 mlrd tonna shartty otyndy quraıdy, — dedi ol.
Sonymen qatar seısmıkalyq barlaý jumystaryn jedeldetý maqsatynda zamanaýı tehnologııalar engizilip jatyr. Atap aıtqanda, dalalyq zertteýlerdi 20 paıyzǵa deıin jedeldetýge múmkindik beretin symsyz qabyldaǵyshtar, sondaı-aq qoljetimdiligi qıyn jáne az zerttelgen aýmaqtarda jumys isteýge arnalǵan elektr-magnıttik ımpýlstik kózder qoldanylyp jatyr.
— «QazMunaıGaz» ulttyq kompanııa retinde geologııalyq barlaý strategııasyn tereń qabattar men az zerttelgen ýchaskelerge baǵyttap, kúrdeli jobalardy iske asyryp jatyr, — dedi Ashat Hasenov.
Buǵan deıin «QazMunaıGaz» UK» AQ jalpy qarjylandyrý kólemi 17,3 mlrd teńge ǵylymı-zertteý jobalary keshenin júzege asyryp jatqanyn jazǵanbyz.
