Qazaqstanda 4739 adam donorlyq aǵza kezeginde tur
ASTANA. KAZINFORM — Elimizde donorlyq aǵzaǵa muqtaj 4739 adam transplantatsııa kezeginde tur. Olardyń 125-i — balalar.
Bul týraly Respýblıkalyq transplantologııa jáne joǵary tehnologııalyq medıtsınalyq qyzmetterdi úılestirý ortalyǵynyń dırektory Aıdar Sıtkazınov málimdedi.
— Qazirgi ýaqytta kútý tiziminde 4739 retsıpıent bar. Onyń basym bóligi búırek transplantatsııasyna muqtaj. Sonymen qatar baýyr, júrek, ókpe, júrek pen ókpeni qatar transplantatsııalaýdy, sondaı-aq kózdiń qasań qabyǵyn aýystyrýdy qajet etetin patsıentter bar, — dedi Aıdar Sıtkazınov.
Ortalyqtyń málimetinshe, kútý tizimindegi 4739 patsıenttiń 4208-i búırek, 293-i baýyr, 208-i júrek jáne 30-y ókpe transplantatsııasyn kútip otyr.
— Balalar arasynda da transplantatsııaǵa muqtajdar az emes. Qazir kútý tiziminde 125 bala tirkelgen. Onyń ishinde 91 balaǵa búırek, 27-sine baýyr, 6-ýyna júrek jáne bir balaǵa ókpe transplantatsııasy qajet, — dedi ortalyq basshysy.
Aıdar Sıtkazınovtyń aıtýynsha, Qazaqstanda aǵza transplantatsııasyn jasaýǵa qajetti medıtsınalyq ınfraqurylym qalyptasqan. Elde 40-tan astam donorlyq medıtsınalyq uıym jumys isteıdi.
— Óńirlik jáne respýblıkalyq úılestirýshiler men transplantatsııa ortalyqtary ózara birlesip jumys atqarady. Qazirgi tańda medıtsınalyq jaǵynan barlyq múmkindik bar. Bul baǵytty retteıtin normatıvtik-quqyqtyq aktiler qabyldanǵan. Búginde negizgi másele — donorlyq aǵzanyń jetispeýi, — dedi spıker.
Onyń sózinshe, transplantatsııany kútip júrgen azamattardyń barlyǵy І toptaǵy múgedektigi bar naýqastar sanatyna jatady jáne olarǵa memleket tarapynan áleýmettik qoldaý kórsetiledi.
Aıta keteıik, osydan bir apta buryn Astanada qaıtys bolǵan donordan júrek transplantatsııasy sátti jasalǵan edi.
