Qazaqstanda 466 myńǵa tarta múgedekter ómir súrip otyr - A. Samaqova
ASTANA. Qazannyń 27-si. QazAqparat /Qanat Mámetqazyuly/ - Qazaqstanda 466 myńǵa tarta múgedekter ómir súrýde. Bul týraly QR Parlamenti Májilisinde «Oqshaýlanýdan teńdikke qaraı: Qazaqstanda múgedekterdiń quqyqtaryn júzege asyrý» atty 2009 jylǵy Adam Damýy týraly Ulttyq Eseptiń tanystyrylymy barysynda depýtat Aıtkúl Samaqova aıtty,
dep habarlaıdy QazAqparat.
«Qazirgi kúni Qazaqstanda 466 myńǵa tarta múgedekter ómir súrip otyr. Bul jalpy halyq sanynyń shamamen alǵanda 3 paıyzyna jýyq kórsetkish bolyp tabylady. Barlyq múgedekterdiń 75,4 paıyzy negizinen eńbekke qabiletti jastaǵy tulǵalar bolsa, 17,5 paıyzy balalar», dedi A. Samaqova. Depýtattyń aıtýynsha, Qazaqstandaǵy múgedekter Konstıtýtsııada jáne basqa da zańnamada kórsetilgen áleýmettik-ekonomıkalyq, jeke quqyq pen bostandyqtyń barlyq erekshelikterin ıelenedi. Al múgedekterdi qorǵaý salasyndaǵy qoǵamdyq qatynastar múgedekterdi áleýmettik qorǵaý týraly zań aıasynda retteledi. Bul zańnan basqa da zań aktilerinde múgedekterdi qorǵaý men olardyń erkindigin qamtamasyz etýge baǵyttalǵan normalar qamtylyp otyr.
«2010 jyldyń qańtarynan bastap arnaıy áleýmettik qyzmetterge baǵyttalǵan taǵy bir zań kúshine enedi. Onda aýyr ómir jaǵdaıyn bastan keshirip otyrǵan jandarǵa, múgedekterge qatysty qyzmetter qamtylyp otyr. Al Ákimshilik kodeksinde atalǵan zańdardyń oryndalý jaýapkershiligi de kózdelgen», dedi ol.
