Qazaqstanda 4,6 myń shaqyrym sý kanaly jańartylady
ASTANA. KAZINFORM — 2030 jylǵa qaraı 14,5 myń shaqyrym sýarý arnalaryn jańǵyrtý jáne betonmen qaptalǵan jelilerdiń úlesin 18%-dan nemese 8 myńnan astam shaqyrymnan 50%-ǵa deıin nemese 14,5 myń shaqyrymǵa deıin ulǵaıtý josparlanǵan. Bul týraly Sý resýrstary jáne ırrıgatsııa mınıstrligi málim etti.
2024-2025 jyldary 1,4 myń shaqyrymnan astam kanal rekonstrýktsııalanyp, jańǵyrtyldy. Aýyz sýmen jabdyqtaý salasynda taǵy 22 joba júzege asyryldy. Olar shamamen 945 myń halqy bar 321 eldi mekendi qamtydy.
Búginde 4,6 myń shaqyrymnan astam kanalda jumystar jalǵasyp jatyr. 2026 jyly onyń 962 shaqyrymyn paıdalanýǵa berý josparlanyp otyr, bul shamamen 200 myń gektar sýarmaly jerdi sýmen qamtamasyz etý jaǵdaılaryn jaqsartady.
Sonymen bir mezgilde mehanıkalyq tazartý jumystarynyń da kólemi artyp otyr. Máselen, ol 2023 jylǵy 678 shaqyrymnan 2024 jyly 1,1 myń shaqyrymǵa, al 2025 jyly 1,8 myń shaqyrymǵa jetti. Sońǵy eki jylda mundaǵy jumystardyń ortasha kólemi jyl saıyn 1,5 myń shaqyrymdy qurady.
2025 jyly Ortalyq Qazaqstandy, sonyń ishinde Astanany da, sýmen qamtamasyz etýde strategııalyq mańyzǵa ıe Q.Sátbaev atyndaǵy kanaldy aýqymdy rekonstrýktsııalaý jáne jańǵyrtý jumystary bastaldy.
Ózge de iri jobalardyń qatarynda D.Qonaev atyndaǵy Úlken Almaty kanalyn jańǵyrtý jumystary bar. Rekonstrýktsııa úsh kezeńnen turady jáne 33,3 myń gektar aýyl sharýashylyǵy jerlerin sýarýǵa múmkindik beredi.
Sýmen jabdyqtaý nysandaryn salý jáne rekonstrýktsııalaý jónindegi taǵy 12 joba shamamen 540 myń adam turatyn 142 aýyldyq eldi meken úshin aýyz sýǵa qoljetimdilikti jaqsartady.
Eske sala keteıik, buǵan deıin Qazaqstanda aýyl sharýashylyǵynda sý únemdeý tehnologııalaryn engizý qarqyn alǵanyn jazdyq. 2025 jyldyń qorytyndysynda mundaı júıeler 543,5 myń gektar alqapty qamtyp, 874 mln tekshe metr sýdy únemdeýge múmkindik berdi.
