Qazaqstanda 46 konfessııanyń 17-si ǵana zańdy dep tanyldy - Din isteri agenttiginiń basshysy
ASTANA. 15 qarasha. QazAqparat - Qazaqstanda buǵan deıin tirkelgen 46 konfessııanyń 17-si ǵana zańdy dep tanyldy.
Bul týraly búgin elordada ótip jatqan Qazaqstan din tanýshylarynyń ІІ forýmynda QR Din isteri agenttiginiń tóraǵasy Qaırat Lama Sharıf aıtty.
Dinı birlestikterdi qaıta tirkeý kóptegen qaýymdardyń dinı ustanymyn baqylaýǵa jaǵdaı jasaǵandyǵyn basa nazar aýdarǵan Q. Lama Sharıf: «Sarapshylardyń jumysy negizinde dinı birlestikterdiń jańa synyptamasy jasaldy. Elimizde buǵan deıin tirkelgen 46 konfessııa men denomınatsııalardyń 17-si ǵana zańdy dep tabylyp otyr. Kezinde jekelegen dinı birlestikter keıbir jaǵdaılarda jańylysyp derbes konfessııalar retinde eseptelip ketken bolatyn»,-dedi.
Agenttik tóraǵasynyń aıtýynsha, osyǵan oraı dinı ustanymy birdeı dinı birlestikter konfessııa boıynsha toptastyryldy. Máselen, buryn jeke konfessııa retinde eseptelgen «Nazarııamın» mıssııasy, «Greıs», «Nadejda», «Emmanýıl» qaýymdary presvıterıandyq shirkeýlerdiń bir konfessııasy aıasyna kirgizildi. «Son Bok Ym», «Novaıa jızn», «Agapel», «Jadva», «Tolyq injil» shirkeýi, «Blogodat» sekildi dinı birlestikter elýinshiler shirkeýleri quramyna toptastyryldy.
«Bizdiń pikirimizshe, sarapshy qoǵamdastyq taraby qaıta tirkeý úrdisiniń nátıjelerin teorııalyq jaǵynan zerdelep, oı eleginen taǵy bir ótkizýi qajet»,-dedi ol.
