Qazaqstanda 46 gradýsqa deıin aptap ystyq bolady
ASTANA. KAZINFORM – 11 shildede Qazaqstannyń 17 óńirinde eskertý jarııalandy. Sınoptıkter aptap ystyq, naızaǵaı, burshaq, jel, shańdy daýyl jáne joǵary órt qaýpi kútiletinin eskertti, dep habarlaıdy «Qazgıdromet» RMK.
Mamandardyń málimetinshe, elimizdiń birqatar aımaǵynda aýa temperatýrasy 40 gradýstan joǵary kóteriledi. Eń joǵary kórsetkish Mańǵystaý oblysynda tirkelýi múmkin.
– 11-17 shilde aralyǵynda Mańǵystaý oblysynda kúndiz óte qatty ystyq kútiledi, aýa temperatýrasy 43-46 gradýsqa deıin kóteriledi. Túrkistan oblysynda 40-43 gradýs, Qyzylorda oblysynda 40-43 gradýs, Ulytaý oblysynda 40-41 gradýsqa deıin aptap ystyq bolady, – delingen habarlamada.
Aqtóbe oblysynda túnde batysta, soltústikte jáne shyǵysta jańbyr jaýyp, naızaǵaı oınaıdy. Kúndiz batysy men ortalyǵynda jańbyr, naızaǵaı, burshaq jáne daýyl kútiledi. Jeldiń ekpini 18 m/s jetedi. 11-15 shilde kúnderi aýa temperatýrasy 35-39 gradýsqa deıin kóteriledi.
Almaty oblysynyń taýly aýdandarynda ótkinshi jańbyr jaýyp, naızaǵaı oınaıdy. Jel ekpini 20 m/s jetýi múmkin. 11-15 shildede kúndiz 35-39 gradýs ystyq kútiledi. 13-14 shildede qatty jaýyn-shashynǵa baılanysty ózenderde sý deńgeıi kóterilip, jekelegen aýmaqtardy sý basý qaýpi bar.
Abaı oblysynyń soltústiginde jańbyr, naızaǵaı jáne burshaq kútiledi. Jeldiń ekpini 28 m/s deıin kúsheıedi. 12-15 shilde aralyǵynda kúndiz 35-39 gradýs ystyq bolady.
Aqmola oblysynyń soltústigi men shyǵysynda ótkinshi jańbyr, naızaǵaı jáne burshaq bolýy múmkin. Jel ekpini 20 m/s jetedi. 11-15 shildede kúndiz 35-39 gradýs, batysy men ońtústiginde 40 gradýsqa deıin qatty ystyq boljanyp otyr.
Atyraý oblysynyń batysy, soltústigi jáne shyǵysynda jańbyr jaýyp, naızaǵaı oınaıdy. Jel 18 m/s deıin kúsheıedi. 11-16 shildede kúndiz 35-39 gradýs ystyq bolady.
Jambyl oblysynyń taýly aýdandarynda jańbyr men naızaǵaı, soltústik-shyǵysynda shańdy daýyl kútiledi. Jel ekpini 20 m/s jetedi. 11-14 shildede kúndiz aýa temperatýrasy 38-42 gradýsqa deıin kóteriledi.
Jetisý oblysynyń taýly aımaqtarynda jańbyr jaýyp, naızaǵaı oınaıdy. Jel 20 m/s deıin kúsheıedi. 11-17 shilde aralyǵynda 35-39 gradýs ystyq kútiledi.
Batys Qazaqstan oblysynda jańbyr, naızaǵaı, burshaq jáne ekpindi jel boljanady. Jel jyldamdyǵy 20 m/s jetedi. Kúndiz 35-38 gradýs ystyq bolady.
Qaraǵandy oblysynda jel ekpini 15 m/s deıin kúsheıedi. 11-15 shilde aralyǵynda kúndiz 35-39 gradýs ystyq saqtalady.
Qostanaı oblysynyń batysy men soltústiginde jańbyr, naızaǵaı, burshaq jáne daýyl kútiledi. Jel 20 m/s deıin kúsheıedi. 11-15 shildede kúndiz 35-38 gradýs bolady.
Qyzylorda oblysynda kúndiz shańdy daýyl kútiledi. Jel ekpini 20 m/s jetedi. 11 shildede aýa temperatýrasy 40-43 gradýsqa, 12-15 shildede 40-42 gradýsqa deıin kóteriledi.
Pavlodar oblysynda jańbyr men naızaǵaı kútiledi. Jel 20 m/s deıin kúsheıedi. 12-15 shildede kúndiz 35-38 gradýs ystyq bolady.
Soltústik Qazaqstan oblysynda jańbyr, naızaǵaı jáne tuman kútiledi. 12-15 shildede kúndiz 35-39 gradýs ystyq boljanady.
Túrkistan oblysynyń taýly aýdandarynda jańbyr men naızaǵaı, batysy men soltústiginde shańdy daýyl kútiledi. Jel 20 m/s deıin kúsheıedi. 11-15 shildede kúndiz 40-43 gradýs ystyq bolady.
Shyǵys Qazaqstan oblysynyń soltústiginde jańbyr, naızaǵaı jáne burshaq boljanady. Jel ekpini 23 m/s deıin jetedi. 12-16 shilde kúnderi 35-38 gradýs ystyq bolady.
Astanada 11 shilde kúni aýa temperatýrasy 35-37 gradýsqa deıin kóteriledi.
Almatyda 11-15 shilde aralyǵynda 35-37 gradýs ystyq kútiledi.
Shymkentte aýa temperatýrasy 40-42 gradýsqa jetedi.
– Anomaldy ystyqqa baılanysty elimizdiń birqatar óńirinde joǵary jáne tótenshe órt qaýpi saqtalady. Azamattarǵa qaýipsizdik talaptaryn saqtaýǵa keńes beriledi, – dep eskertti sınoptıkter.
