Qazaqstanda 450-den astam aýǵan stýdenti oqyp jatyr

ASTANA. QazAqparat – Bıyl Qazaqstan Aýǵanstannan kelgen stýdentterge 30 grant bólýge daıyn. Bul týraly elordada ótip jatqan Qazaqstan men Aýǵanstan bıznes-forýmynda Premer-Mınıstrdiń orynbasary – saýda jáne ıntegratsııa mınıstri Serik Jumanǵarın málim etti, dep habarlaıdy QazAqparat tilshisi.

«Qazaqstan aýǵan stýdentterin oqytý boıynsha bilim berý baǵdarlamalaryn iske asyrýǵa daıyn. Bıyl Qazaqstan Aýǵanstannan kelgen stýdentterge 30 grant bóledi», - dedi S. Jumanǵarın.

Onyń aıtýynsha, Qazaqstanda 450-den astam aýǵan stýdenti oqyp jatyr.

«Qazaqstan aýǵan halqyna materıaldyq jáne gýmanıtarlyq qoldaý kórsete otyryp, Aýǵanstan úshin gýmanıtarlyq kómekti qamtamasyz etýge óz úlesin qosa bermek», - dedi mınıstr.

Budan buryn habarlanǵandaı, Aýǵanstannyń ónerkásip jáne saýda mınıstri Nýrıddın Azızı Qazaqstannyń gýmanıtarlyq kómegine alǵys aıtty.