Qazaqstanda 447 shetel azamaty probatsııada tur - Erlan Turǵymbaev

NUR-SULTAN. QazAqparat – Parlament Senatynyń jalpy otyrysynda «Táýelsiz Memleketter Dostastyǵyna qatysýshy memleketterdiń bas bostandyǵynan aıyrýmen baılanysty emes jazalardy oryndaýdy berý týraly konventsııasyn ratıfıkatsııalaý týraly» Zańy qabyldandy, dep habarlaıdy QazAqparat tilshisi.

«Konventsııanyń negizgi maqsaty – ár azamatqa óz jazasyn turǵylyqty jeri boıynsha óteýge múmkindik berý. Konventsııaǵa Ashǵabat qalasynda 2019 jyly Reseı, Armenııa, Belarýs, Qazaqstan, Qyrǵyzstan, Ózbekstan prezıdentteri qol qoıdy.

«Konventsııaǵa sáıkes, sottalýshy nemese onyń zańdy ókili jazany turǵylyqty jerinde óteý týraly ótinish beredi. Ótinish boıynsha sol eldiń Bas prokýratýrasy suraý salady. Suraý salýǵa myna qujattar qosa beriledi: sottalýshynyń azamattyǵy, onyń jazbasha kelisimi, sot sheshiminiń kóshirmesi, minezdeme, keltirilgen shyǵyn týraly málimetter. Jazasyn óteýshini qabyldaıtyn memleket belgilengen jazadan qatań emes jaza taǵaıyndaıdy», - dedi QR Іshki ister mınıstri Erlan Turǵymbaev.

Onyń aıtýynsha, jazasyn óteýshi sheshim qabyldanǵan soń 45 kún ishinde óz betinshe elden shyǵýy tıis. Al eger bul talap oryndalmasa, zań boıynsha májbúrli túrde elden shyǵarylady.

Suraý salýdan bas tartý negizderi de qarastyrylǵan:

• Ulttyq zańnamaǵa sáıkes, jazasyn óteýshiniń áreketi qylmys bolyp tabylmasa;

• Qylmystyń merzimi ótip ketse;

• El táýelsizdigine, ulttyq qaýipsizdikke qaýip bolsa;

• Jazasyn óteý merzimi 6 aıdan az bolsa;

• Ulttyq zańnamaǵa qaıshy ózge de jaǵdaılarda bas tartylady.

«Qazirgi ýaqytta elimizde 447 shetel azamaty probatsııada tur. Ózbekstannan 216, Reseıden 138, Qyrǵyzstannan 38, Armenııadan 5 azamat. Al ózge elderde 280 Qazaqstan azamaty jazaǵa tartylǵan. Reseıde 251, Ózbekstanda 24, Qyrǵyzstanda 2, Belarýste 3 azamat», - dep naqtylady mınıstr.

«Taǵy bir atap ótetin másele – dúnıejúzinde osyndaı álemdik tájirıbe bar. Eýroodaqqa múshe memleketter osy Konventsııaǵa uqsas Deklaratsııa qabyldaǵan. Osy Zańdy qabyldaý - jazasyn óteýshilerdi turǵylyqty jeri boıynsha qaıtarýǵa, olardyń qoǵamǵa tıimdi oralýyna múmkindik beredi», - dedi Erlan Turǵymbaev.