Qazaqstanda 442,5 myń adam jumyssyz
ASTANA. QazAqparat - Qazaqstanda 2019 jyldyń qańtar aıynda jumyssyzdar sany 442,5 myń adamdy qurady, bul jalpy jumys kúshiniń 4,8% quraıdy (2018 jyldyń jeltoqsanynda 4,9%). Bul týraly QR Uttyq ekonomıka mınıstrliginiń Statıstıka komıtetinen málim etti, dep habarlaıdy QazAqparat tilshisi.
Bıyl qańtar aıynyń sońynda elimizdiń jumyspen qamtý organdarynda 111 myń adam, ıaǵnı eldiń ekonomıkalyq belsendi turǵyndarynyń 1,2% jumyssyz retinde resmı tirkelgen.
Jasyryn jumyssyzdyq deńgeıi 2018 jyldyń qazan-jeltoqsan aılarynda 25,1 myń adam nemese jalpy jumys kúshiniń 0,3% qurady.
Qazaqstan ekonomıkasynda 2019 jyly 8,7 mln adam qamtylǵan. Sonyń 6,6 mıllıony nemese 76,1% jaldamaly jumysshylar.
Byltyrǵy IV toqsannyń derekterine súıensek, ózin-ózi jumyspen qamtyǵandardyń ishinde eńbek ónimdiligi joǵary adamdardyń úlesi - 90,9%, ónimdiligi tómen adamdardyń úlesi 9,1% boldy.
