Qazaqstanda 44 gradýs qytymyr aıaz taǵy úsh kún saqtalady

Qazgıdromet sınoptıkteri 12-14 jeltoqsanǵa arnalǵan úsh kúndik aýa raıy boljamyn jarııalady. 

Jańa apta aıazdy aýa raıymen bastaldy. Aldaǵy kúnderi de Qazaqstannyń basym bóliginde aıaz saqtalady. Oǵan arktıkalyq antıtsıklon sebep bolyp otyr.

12-13 jeltoqsanda atmosferalyq fronttardyń áserinen respýblıkanyń shyǵysynda, ońtústiginde jáne ońtústik-shyǵysynda qar jaýady.

12 jeltoqsanda taýly aımaqtarda qalyń qar jaýady.

Qazaqstannyń ońtústigi men shyǵysynda jel kúsheıip, taýly jerlerde tuman túsedi.

«12-13 jeltoqsan túnde aýa temperatýrasy tómendeıdi: soltústik-batysta jáne ortalyqta — mınýs 25-38, soltústikte — 30-38 gradýs aıaz, respýblıkanyń qıyr soltústigi men soltústik-batysynda — 40-44 gradýs aıaz. Respýblıkanyń shyǵysynda — 20-38, 14 jeltoqsanda — 32-38, keı jerlerde mınýs 40-42 gradýsqa deıin, ońtústikte jáne ońtústik-shyǵysta —25-30, taýly aımaqtarda 33-38 gradýs aıazǵa deıin sýytady» deıdi Qazgıdrometten.   

14 jeltoqsannan bastap arktıkalyq antıtsıklon soltústik-shyǵys baǵytqa aýysady.

Osyǵan baılanysty eldiń batys jartysynda sýyq aýa azaıa bastaıdy.

Sonyń nátıjesinde aýa temperatýrasy kóterilip, túnde batysta 5-16 aıazǵa deıin, soltústik-batysta 15-35 aıazǵa deıin, soltústikte 25-38 gradýs aıazǵa deıin ózgeredi.