Qazaqstanda 43 myńnan astam kámeletke tolǵan jetim baspana ala almaı otyr
ASTANA.KAZINFORM — Senator Andreı Lýkın jetimder úıiniń kámeletke tolǵan túlekterine baspana alýda basym quqyqty zań júzinde bekitýdi jáne páterlerdi bólý kezinde buzýshylyqtarǵa jol bergen sheneýnikterdiń jaýapkershiligin kúsheıtýdi usyndy.
Onyń aıtýynsha, qazirgi tańda baspana alý kezeginde shamamen 61 myń jetim bala tur, olardyń 43 myńnan astamy kámelet jasyna jetken. Alaıda aldaǵy jyldary bul kezektiń qysqarýy boljanbaı otyr.
Baspanaǵa muqtajdardyń eń kóp sany Almaty oblysynda — shamamen 7,2 myń adam, Shyǵys Qazaqstan oblysynda — 6,4 myń, Qaraǵandy oblysynda — 5,9 myń, Qostanaı oblysynda — 5,7 myń jáne Aqtóbe oblysynda — 3 myń adam tirkelgen.
Senator sońǵy jyldary el boıynsha bólingen shamamen 60 myń turǵyn úıdiń tek 7 myńy ǵana jetim balalarǵa berilgenin atap ótti. Bul jalpy kólemniń 11,8 paıyzyn quraıdy.
— Budan bólek, kámeletke tolǵan balalar úıi túlekteriniń baspana almaýynyń bir sebebi kezekte buryn tirkelgen kámeletke tolmaǵan jetimderdiń bolýy. Mundaı sanattaǵy azamattar sany shamamen 17 300 adamdy quraıdy. Al kámeletke tolmaǵandar óz kezeginde jasyna jetpeıinshe baspana alý quqyǵyn paıdalana almaıdy jáne balalar úıinde turýyn jalǵastyrady. Nátıjesinde turǵyn úı qory ózge sanattaǵy azamattarǵa qaıta bólinip, jetim balalardyń basym quqyǵy eskerilmeıdi, — dedi ol.
Senator sondaı-aq óńirlerde birqatar zańbuzýshylyqtardyń baryn atap ótti. Atap aıtqanda, jetimderge arnalǵan páterlerde bógde tulǵalardyń zańsyz turýy jáne aqparattyq júıelerdi kóshirý kezinde derekterdiń joǵalýy sııaqty faktiler tirkelgen.
Onyń pikirinshe, atalǵan máseleler jergilikti atqarýshy organdar tarapynan baqylaýdyń jetkiliksizdigin jáne turǵyn úı saıasatyn iske asyrýda formaldy tásildiń basym ekenin kórsetedi.
Osyǵan baılanysty ol jetim balalardy turǵyn úımen qamtamasyz etý boıynsha jyl saıynǵy kórsetkishteri bar keshendi jol kartasyn ázirleýdi, sondaı-aq turǵyn úıdi bólý protsesine baqylaýdy kúsheıtip, Smart Data Ukimet, ulttyq bilim berý derekter bazasy, Órken, Otbasy bank, kezekte.kz jáne ózge de tsıfrlyq platformalar arqyly ashyq esep júıesin engizýdi usyndy.
Sonymen qatar senator jetim balalardyń turǵyn úı alýdaǵy basym quqyǵyn zańnamada bekitýdi qajet dep sanaıdy.
— Ýákiletti memlekettik organdar Eńbek jáne halyqty áleýmettik qorǵaý mınıstrligi, Oqý-aǵartý mınıstrligi, Ádilet mınıstrligi tarapynan balalar úıiniń túlekterine turǵyn úı alýda basym quqyq berý bóliginde zańnamaǵa tıisti ózgerister engizý máselesin qarastyrý qajet, — dep atap ótti ol.
Buǵan deıin múgedektigi bar jandardy baspanamen qamtamasyz etý talaptaryn jazǵanbyz.
