Qazaqstanda 42 JOO úsh tildi kadrlar daıarlaıdy - QR MSM

ASTANA. QazAqparat - Respýblıkada búgingi tańda jumys istep turǵan 125 joǵary oqý ornynyń 42-nde stýdentterdi oqytý úsh tilde júrgiziledi, onda 474,9 myń stýdent oqıdy, dep málimdedi QR Mádenıet jáne sport mınıstrligi bilim berý, ǵylymı qyzmet jáne halyqaralyq yntymaqtastyq departamentiniń dırektory Dinıslam Bolathanuly.

«Indýstrııalyq-ınnovatsııalyq damytýdyń memlekettik baǵdarlamasyn tabysty júzege asyrý úshin mamandar daıarlaý maqsatynda bazalyq JOO-lar anyqtalǵan, elimizdiń 42 JOO-da úsh tildi kadrlardy daıarlaıdy», - dedi ol. 

Departament basshysynyń málimetinshe, búginde respýblıkada 125 JOO jumys jasaıdy, onda 474,9 myń stýdent, 32500 magıstrant, 2 myń doktorant oqıdy, dep habarlady primeminister.kz.

«Joǵary bilim berýmen qamtý 48,4%-dy quraıdy. JOO-lar túlekterin eńbekpen qamtýdyń kórsetkishi joǵary oqý ornyn aıaqtaǵan soń bir jyldan keıin búginde 69,8%-dy quraıdy», - dedi D.Bolathanuly.  

Sonymen qatar, MSM ókili óner joǵary oqý oryndarynda, ıaǵnı Qurmanǵazy atyndaǵy Qazaq Ulttyq konservatorııasynda, Qazaq ulttyq óner ýnıversıtetinde jáne t.b. barlyǵy 3,7 myń stýdent bilim alatynyn aıtyp ótti. Olardyń ishinde memlekettik bilim berý tapsyrysy negizinde - 3 myńǵa jýyq stýdent. Jyl saıyn 780 adam oqýyn bitiredi, olardyń 709-y memlekettik tapsyrys negizinde.

Júrgizilgen monıtorıng boıynsha, osy JOO-lardyń túlekterin eńbekpen qamtý búginde 70% astamdy quraıdy. «Eger naqty sandardy aıtar bolsaq, 595 stýdent jumyspen qamtylady, olardyń ishinde memlekettik tapsyrys boıynsha oqyǵandary - 543 adam», - dep naqtylady D.Bolathanuly.