Qazaqstanda 42 jańa sý qoımasy salynady

ASTANA. KAZINFORM — Sý resýrstaryn basqarý júıesin damytýdyń tujyrymdamasyna sáıkes, 2030 jylǵa deıin elimizde jańa sý qoımalaryn salý josparlanyp otyr. Bul jóninde QR Sý resýrstary jáne ırrıgatsııa vıtse-mınıstri Erbolat Ibraıhanov málimdedi.

Onyń sózinshe, jańa nysandardy salýmen qatar, eskirgenderi jóndeýden ótedi. Naqtyraq aıtqanda, 37 sý qoımasy jáne 110 qurylysjaı rekonstrýktsııalanady. Sondaı-aq 14 500 shaqyrym sý arnasy jańǵyrtylyp, 557 gıdrotehnıkalyq qurylystyń jaǵdaıyna jan-jaqty tekseris júrgiziledi.

Sonymen birge, E. Ibraıhanov mınıstrliktiń byltyr atqarǵan jumystaryna toqtaldy.

— QR Sý resýrstary jáne ırrıgatsııa mınıstrligi 2025 jyly 147 ınfraqurylymdyq jobany iske asyrýdy bastady. Onyń ishinde 53 joba aıaqtaldy. Atap aıtqanda, 677 shaqyrym ırrıgatsııalyq júıelerdi jańǵyrtý, 4 sý qoımasyn (Qyzylaǵash, Kırov, Qapshaǵaı, Shar sý qoımalaryn) rekonstrýktsııalaý, 15 toptyq sý qubyryn salý-jóndeý, 3 qurylysjaıdy rekonstrýktsııalaý jumystary júrgizildi, — dedi vıtse-mınıstr.

Aıta keteıik, buǵan deıin Túrkistan oblysynda jańa eki sý qoımasynyń qurylysy aıaqtalýǵa jaqyn ekenin jazǵanbyz.