Qazaqstanda 41 mln tonnadan astam jemshóp daıyndaldy
ASTANA. KAZINFORM – Qazaqstanda aýyl sharýashylyǵy taýaryn óndirýshiler 41 mln tonnadan astam jemshóp daıyndady, dep habarlaıdy Aýyl sharýashylyǵy mınıstrligi.
Oblystar ákimdikteriniń málimetine sáıkes, bul aldaǵy qysqy qora-jaı kezeńine josparlanǵan kólemniń 103,6%-yn quraıdy.
Atap aıtqanda, 26,7 mln tonna shóp ázirlendi, bul jospardyń 104,1%-y. Sondaı-aq 2,4 mln tonna pishendeme (102,5%), 2,8 mln tonna súrlem (99,4%), 4,8 mln tonna saban (102%) jáne 4,6 mln tonna qunarlandyrylǵan jem (80,6%) daıyndaldy.
– Jemshóptiń negizgi túrleri boıynsha josparly kórsetkishterdiń artyǵymen oryndalýy qosymsha qor qalyptastyrýǵa jáne aldaǵy qysqy qora-jaı kezeńinde mal sharýashylyǵy kásiporyndarynyń aýa raıynyń qolaısyz jaǵdaılaryna tótep berýine múmkindik beredi, – delingen mınıstrlik habarlamasynda.
Sonymen qatar sharýashylyqtarda ótken jylǵy qystyq kezeńnen qalǵan jemshóp qory bar.
Aýyl sharýashylyǵy taýaryn óndirýshilerdi qosymsha jemshóp resýrstarymen qamtý maqsatynda «Azyq-túlik kelisimshart korporatsııasy» AQ aldaǵy qysqy kezeńge astyqtyń jemdik qoryn ázirledi. Qajet bolǵan jaǵdaıda ol rezervtik resýrs retinde paıdalanylady.
Aýyl sharýashylyǵy mınıstrligi óńirlerdiń ákimdikterimen birlesip, jemshóp daıyndaý naýqanynyń qorytyndy kezeńine monıtorıng júrgizýdi jalǵastyryp jatyr.
Barlyq is-shara jemshóptiń qajetti qoryn ýaqtyly qalyptastyrýǵa, mal sharýashylyǵy kásiporyndaryn jetkilikti jemshóp bazasymen qamtamasyz etýge jáne aldaǵy qysqy qora-jaı kezeńiniń turaqty ótýine baǵyttalǵan.
Aıta keteıik, buǵan deıin elimizde mal sharýashylyǵyn jemshóppen qamtamasyz etý jáne qysqy kezeńge daıyndyq máseleleri boıynsha óńirlerde jemshóp qoryn qalyptastyrý jumystary júrgizilip jatqany habarlanǵan.
