Qazaqstanda 41 mln tonnadan astam jem daıyndaldy

ASTANA. KAZINFORM – Aýyl sharýashylyǵy mınıstrligi jergilikti atqarýshy organdarmen birlesip jem-shóp óndirisin damytý boıynsha jumysty jalǵastyryp jatyr. Bul týraly vedomstvonyń baspasóz qyzmeti málim etti. 

Jemshóp daqyldary úshin sýarmaly jerlerdiń alańdaryn keńeıtý, jem-shóp daqyldarynyń tuqym sharýashylyǵyn damytý, aýylsharýashylyǵy tehnıkasyn satyp alý, jaıylymdyq jerlerdiń ónimdiligin arttyrý jóninde sharalar qabyldaý maqsatynda vedomstvo jem-shóp óndirisin damytýdyń Jol kartasyn ózektendirý boıynsha jumys júrgizip jatyr. 

«Aǵymdaǵy jyly óńirlerdiń derekteri boıynsha jem-shóp daqyldarynyń egistik alqaptary 3,2 mln. gektardan asty, bul 2023 jylmen salystyrǵanda 83,5 myń gektarǵa artyq. Bul rette egistikke ornalastyrylatyn jem-shóp úlesi shamamen 14%– qurady (2023 jyly-13%). 24,5 mln.tonna shóp (bir jarym jyldyq — 36,7 mln. tonna), pishen — 1,7 mln. tonna, saban — 4,6 mln. tonna, kontskorm — 5,5 mln. tonna jáne súrlem — 2,0 mln. tonna daıyndaý josparlanǵan», — delingen habarlamada. 

Aǵymdaǵy jyldyń 1 qazandaǵy jaǵdaı boıynsha 32,1 mln.tonna kóleminde shóp nemese bir jarym jyldyq jospardan 87,6%, 1,8 mln tonna pishen nemese jyldyq jospardan 108,5%, 2,5 mln tonna qurama jem (44,9%), 1,6 mln tonna súrlem (83,5%) jáne 3,1 mln tonna saban daıyndaldy (67,7%).

Jalpy, Qazaqstanda jem-shóppen qamtamasyz etý jaǵdaıy turaqty dep boljanyp otyr.