Qazaqstanda 406 kásiporyn 406 kolledjdi óz qamqorlyǵyna aldy

NUR-SULTAN. QazAqparat – Qazaqstanda kásiporyndar kolledjderdi qamqorlyǵyna alyp, maman daıarlaýyna kómektesedi. Bul týraly QR Bilim jáne ǵylym mınıstri Ashat Aımaǵambetov aıtyp berdi, dep habarlaıdy QazAqparat.

«2021 jyly 51 kásiporyn kolledjderge qamqorlyq jasasa, qazir 406 kásiporyn 406 kolledjdi qamqorlyǵyna aldy. Mysaly, «Kaztsınk», «SaryarqaAvtoProm», «Don» taý-ken kombınaty, Altyntau, Kokshetaý kásiporyndary kolledjderdi qamqorlyqtaryna alyp, jumys isteýde. Olar baǵdarlamalardy jańartý, dýaldy oqytý, materıaldyq bazany nyǵaıtý sııaqty jumystarǵa da aralasýy tıis», - dedi A. Aımaǵambetov Úkimettiń búgingi otyrysynda.

Sonymen birge, bıyl taǵy bir pılottyq joba bastaldy – kásiporyndardyń ózderine maqsatty tapsyrys berý arqyly olar kadr daıarlaý jumysyna tartylady.

«Bıylǵy jańa oqý jylynda olarǵa maqsatty 20 myń grant beremiz. Bıznes mamandardyń biliktiligine kúmán týdyrsa, endi biz olardyń ózderin osy jumysqa tarttyq. Kásiporyndar stýdentterdi jáne oqytatyn uıymdy da tandaıdy, biraq sol túlekterdiń jumysqa ornalasýy, dýaldy oqytý jáne praktıkadan ótýi boıynsha kepildik beredi. Osylaısha mamandardy daıarlaýdyń sapaly bolýyna da jaýapty. Bul úshin aldyn ala kelisim bar», - dep túsindirdi Bilim mınıstri.

Aıta keteıik, kelesi oqý jyly úshin joǵary oqý oryndaryna 73 myń, kolledjderge 31 myń grant bólinedi. Qazaqstanda 50-ge jýyq eski mamandyq boıynsha oqytý toqtatyldy jáne buryn-sońdy bolmaǵan 60-qa jýyq mamandyq ashylǵan. Sonymen birge, elimizde 2 jylda maman ázirleıtin «Qoldanbaly bakalavrıat» pılottyq jobasy bastalady.