Qazaqstanda 400-den astam jaıly mektep salynady
QR Premer-Mınıstriniń orynbasary Altaı Kólginovtiń basshylyǵymen Úkimette ótken keńeste jobany iske asyrý máseleleri qaraldy.
Keńeske óńirler men qalalar ákimdikteriniń, QR Oqý-aǵartý mınıstrligi, QR Indýstrııa jáne ınfraqurylymdyq damý mınıstrliginiń, «Samruk-Kazyna Construction» AQ jáne basqa da memlekettik organdardyń basshylary qatysty.
Ulttyq jobany iske asyrý arqasynda respýblıkada 840 myńnan astam oqýshy orny (eki aýysymda) qurylady.
Altaı Kólginov qajettilik bar qalalar men aýdandarda jańa formattaǵy mektepter salýdyń mańyzdy ekenin atap ótti.
Máselen, 2023 jyly ákimdikter Oqý-aǵartý mınıstrligimen jáne jáne «Samruk-Kazyna Construction» AQ ulttyq jobasynyń biryńǵaı operatorymen birlesip, 400-den astam jaıly mekteptiń ishinde 467 800 oqýshyǵa arnalǵan 221 mektep salýǵa kirisýi qajet.
«Іri qalalarda ishki kóshi-qonnyń úlesi edáýir ekenin, týý koeffıtsıenti men halyqtyń tyǵyzdyǵy joǵary ekenin eskere otyryp, mektepterde 2,5 myń oqýshyǵa arnalǵan oryn bolýy kerek. Mundaı úlken mektepter tıptik mekteptermen salystyrǵanda 2-3 ese kóp oqýshy oryndaryn qurýǵa múmkindik beredi. Bul apatty mektepterdi joıý, úsh aýysymmen oqytatyn jáne tyǵyzdalǵan oqytý rejımi máselelerin sheshýge, bilim berý sapasyn edáýir arttyrýǵa jáne oqytý úshin qolaıly jaǵdaılar jasaýǵa múmkindik beredi. Bul másele – Memleket basshysynyń baqylaýynda», — dedi QR Premer-Mınıstriniń orynbasary Altaı Kólginov.
Elimizdiń qalalary men óńirleri ákimdikteriniń aldyna Oqý-aǵartý mınıstrligimen, «Samruk-Kazyna Construction» AQ jáne basqa da jaýapty organdarmen birlesip, vıtse-premer Altaı Kólginov mynadaı mindetter qoıdy: osy jyldyń sońyna deıin ulttyq jobany iske asyrýdyń naqty merzimderin kórsete otyryp, Jol kartasyn bekitý, basshylyqtan jaýapty tulǵalardy bekitý, oqý ordalarynyń qajettilikterin eskere otyryp, jer ýchaskelerin rásimdeý boıynsha jumysty aıaqtaý, 2023 jyldyń kókteminde jańa formattaǵy mektepterdiń qurylysyn bastaý.
Foto: primeminister.kz
