Qazaqstanda 400-den astam kıprlik kompanııa jumys isteıdi
ASTANA. KAZINFORM – Qazir elimizde Kıpr kapıtalynyń qatysýymen 400-den astam kompanııa jumys istep jatyr. Olardyń otyzǵa jýyǵy «Astana» halyqaralyq qarjy ortalyǵynda tirkelgen. Bul týraly Memleket basshysy Qasym-Jomart Toqaev BAQ-qa málimdemesinde aıtty.
Prezıdenttiń aıtýynsha, bul kórsetkish elderimizdiń iskerlik jáne ınvestıtsııalyq baılanystary dáıekti túrde damyp jatqanyn kórsetedi.
– Búgin elordada Qazaqstan-Kıpr bıznes-forýmy ótedi. Mańyzdy jıynda eki eldiń isker toptary qatysady. Kıpr kásipkerleri delegatsııasy osy forýmǵa arnaıy keldi. Sol úshin Qurmetti Prezıdent myrzaǵa zor rızashylyǵymdy bildiremin, – dedi Qasym-Jomart Toqaev.
Memleket basshysy Qazaqstan óz naryǵynda jumys isteýge nıetti Kıpr kompanııalaryna qolaıly jaǵdaı jasaýǵa árqashan daıyn ekenin eske saldy. Ol Kıprdiń isker azamattaryn uzaq merzimge arnalǵan ınvestıtsııalyq jobalardy iske asyrýǵa shaqyrdy.
– Jaqynda elimizde jańa Konstıtýtsııa qabyldandy. Ata zańǵa sáıkes, Qazaqstanda menshiktiń barlyq túrine kepildik beriledi. Bas qujatymyz ınvestorlardyń quqyǵyn barynsha qorǵaıdy. Oǵan qosa, kıprlyq áriptesterimiz Qazaqstannyń «Altyn vıza» baǵdarlamasyn qoldana alady. Bul vızany alǵan kásipkerler men mamandarǵa salyq jáne kóshi-qon máselelerinde jeńildikter usynylady, – dedi Qazaqstan Prezıdenti.
Aıta keteıik, 2-4 maýsym kúnderi Memleket basshysy Qasym-Jomart Toqaevtyń shaqyrýymen Kıpr Respýblıkasynyń Prezıdenti Nıkos Hrıstodýlıdıstiń Qazaqstanǵa resmı sapary ótedi. Táýelsizdik saraıynda Qasym-Jomart Toqaev Kıpr prezıdentin saltanatpen qarsy aldy.
Buǵan deıin Qasym-Jomart Toqaev Kıpr prezıdentin І dárejeli Dostyq ordenimen marapattady.
