Qazaqstanda 4 mln adam jastar sanatyna jatady
Bir aptadan astam ýaqyt boıy Zerendi kóliniń jaǵasynda jatyp, bıznestiń álippesin úırengen jastar tálimgerlerimen birge daıyndaǵan jobalaryn top-topqa bólinip qorǵady. Úzdik dep tanylǵan joba avtorlaryn QR Premer-Mınıstriniń orynbasary Gúlshara Ábdiqalyqova marapattap, sharaǵa qatysýshylarǵa lebizin bildirdi.
«Barlyq jaǵynan memleket jastarǵa qoldaý kórsetý kerek. Osy jyl Jastar jyly bolyp belgilendi. Prezıdent Qasym-Jomart Toqaev ta jastarǵa kóptegen basymdyq beriletinin aıtyp keledi. Jastardy qoldaý maqsatynda jol kartasy jasalyp, 89 baǵyt aıqyndalǵan bolatyn. «Zeren» lageri - sonyń biri. Bul shara jyl saıyn bolady, ári qaraı jalǵasady dep senemin», - dedi Premer-Mınıstrdiń orynbasary.
Onyń aıtýynsha, Qazaqstanda 4 mln adam jastar sanatyna jatady.
«29 jasqa deıingi mamandardy baspanamen qamtý úshin Nur-Sultan, Almaty, Shymkent qalalarynda 3 jyldyń ishinde 9000-nan astam arendalyq úı beriletin boldy. Eń basty baǵyt - jastardy kásipkerlikke baýlý. «Jas kásipker» baǵdarlamasynyń aıasynda bıyl 9000-nan astam jasqa 505 myń teńgelik granttar bólinip otyr. «Bastaý» baǵdarlamasy taǵy bar. Bazar tóńireginde júrgen jastar bar, margınal toptar bar. «Bastaý» osyndaı býynǵa arnalǵan. Eldegi 180 kolledj ben 20 ýnıversıtet Nazarbaev ýnıversıteti úlgisimen qaıta jabdyqtalady. Bul keıin búkil respýblıka aýmaǵyna taratylatyn bolady. Búgingi lagerdiń taǵy bir maqsaty - tájirıbe almasý. Aldaǵy bir aıda taǵy eki lekpen sizder sııaqty 400 jas kelip, bolashaqqa baǵdar alyp qaıtady. Elimizde 4 mln jas bar. Bul - úlken kúsh. Erteńimizdiń tiregi de ózderińizsizder», - degen Gúlshara Ábdiqalyqova jobasy ozyq dep tanylǵan jastardy marapattady.
Jazǵy lagerge elimizde bilim alyp júrgen sheteldik qazaq jastary da shaqyrylypty. Reseı, Ózbekstan, Qytaı jáne Mońǵolııa elinde turatyn jastar qazaqstandyq qandastarymen jaqyn tanysyp, birge bıznes jobalar qorǵaýǵa múmkindik alyp otyr.
«Biz bıyl Nur-Sultan qalasynda daıyndyq kýrsynan ótken bolatynbyz. Jýyqta ǵana UBT synaǵynan sátti ótip, osynda oqýǵa qalýǵa múmkindik aldyq. Zerendide ár saǵatymyz, ár mınýtymyz tıimdi ótip jatyr. Tálimgerler bar bilgenderin úıretip jatyr. Ulttyq aq taǵam stılimen tabıǵı balmuzdaq jasaý burynnan oıymda bar bolatyn. Búgin sony naqty jobaǵa aınaldyrdyq» Zerendiniń jaǵasyndaǵy máni kúnder máńgi esimizde qalatyn shyǵar», - deıdi mńoǵolııalyq jas Aqmóldir Qııalqanqyzy.
Eske salsaq, 4 shilde kúni Aqmola oblysynda «Zeren-2019» jas kásipkerler lageriniń alǵashqy maýsymy bastalǵan bolatyn.
Eldiń 17 óńirinen kelgen 200 jas Zerendi kóliniń jaǵasynda elgen tanymal tulǵalarmen, joǵary laýazym ıelerimen kezdesip, ashyq áńgime órbitýge múmkindik alýda. QR Aqparat jáne qoǵamdyq damý mınıstri Dáýren Abaev ta Zerendige baryp, jastarmen kezdesken edi.
