Qazaqstanda 4 mıllıon bala sapaly túski assyz qalý qaýpi bar - depýtat

ASTANA. KAZINFORM – Májilisiniń depýtaty Ekaterına Smolıakova Premer-mınıstrge depýtattyq saýal joldap, mektep tamaǵyna qoıylǵan jańa talaptar men bólinetin qarjy kóleminiń sáıkes kelmeıtinin aıtty.

Májilismenniń aıtýynsha, 2025 jylǵy 4 naýryzda jańartylǵan Standarttyń engizilýi et, sút ónimderi, kókónis pen jemis-jıdekterdi tutyný normalaryn arttyrdy. Bul mektep oqýshylarynyń tamaq sapasyn jaqsartýy tıis edi. Alaıda bıýdjettik lımıtter burynǵy deńgeıde qaldy, jáne dál osy jaǵdaı búkil júıede shıelenis týdyryp otyr.

«Standart bar, talap bar, biraq soǵan saı naqty qarjylyq baza joq», - dedi depýtat.

Smolıakova naqty mysaldar keltirip, normalar men naqty shyǵystar arasyndaǵy aıyrmashylyqty kórsetti: sıyr eti kılogrammy 4 200 teńgege deıin, qus eti - 1 650 teńge, sary maı - 1 225 teńge, sút - 394 teńge. Osy jaǵdaıda bir balaǵa kúndelikti 714-750 teńge lımıtimen tolyqqandy mázir jasaý múmkin emes.

Depýtattyń aıtýynsha, osyndaı jaǵdaılarda kásipkerlerge sapasy kúmándi arzan ónim satyp alý nemese mektepten ketip, qyzmetin toqtatý ǵana qalady, bul tamaqtandyrýdy uıymdastyrýǵa qaýip tóndiredi.

Ol búkil el boıynsha alańdatarlyq sıgnaldar kelip túsetinin, mektep tamaǵy salasynda 150-den astam kásipker men shamamen 70 000 qyzmetker jumys isteıtinin atap ótti.

Qosymsha júkteme retinde basqa júıelik problemalar da bar, qymbat jabdyqty mindetti túrde jalǵa alý, tamaq qunyn esepteýdiń biryńǵaı mehanızmi joq, naqty baǵalardy kórsetpeıtin shartty statıstıkaǵa súıený, sondaı-aq balanyń basqa mektepke aýysqan kezde tamaq derekteriniń joǵalýy.

«Búgin ata-analar da, kásipkerler de, qoǵam da bir suraqty jıi qoıyp otyr: biz basqa salalarǵa qarajatty ońaı taba alamyz da, nelikten dál balalardyń kúndelikti tamaǵyna kelgende únemdeýge májbúr bolamyz?» – dep suraq qoıdy depýtat.

Smolıakova bul syn emes, memlekettik basymdyqtardy ózgertý qajettiligi ekenin atap ótti. Onyń aıtýynsha, mektep tamaǵy – eldegi ár balanyń máselesi jáne ol júıeli sheshimdi qajet etedi.

Depýtat saýalda 2026 jylǵy 1 qańtardan bastap mektep tamaǵyna bólinetin qarjyny qaıta qaraýdy, ony naqty baǵa ósimine sáıkes ındeksatsııalaýdy, bıýdjeti shekteýli óńirlerge qosymsha qoldaý bólýdi, tamaq qunyn esepteýdiń biryńǵaı respýblıkalyq ádistemesin ázirleýdi jáne jetkiziletin ónim sapasyna baqylaýdy kúsheıtip, arzan almastyrǵyshtar men «sur» ımporttyń enýine jol bermeýdi usynady.

Aıta keteıik, ShQO-da uzaqqa sozylǵan talqylaýlardan keıin mektep ashanalarynyń máziri bekitildi.