Qazaqstanda 4 aıda bir myńǵa jýyq áskerı oqý-jattyǵý ótkizildi

ASTANA. QazAqparat - Qazaqstan Respýblıkasynyń Qarýly kúshterinde bıyl negizgi kúsh-jiger jaýyngerlik ázirliktiń joǵary dárejesine keltirý kezinde jeke quramnyń daǵdysyn, is-qımyldaryn shyńdaýǵa, áskerı qyzmetshilerdiń dene daıarlyǵyn arttyrý jáne basqarý júıesin jetildirýge baǵyttaldy, dep habarlaıdy QR Qorǵanys mınıstrliginiń baspasóz qyzmeti.

Eger 2015 jyly Qarýly kúshterde 3 500-deı ártúrli oqý-jattyǵý ótkizilse, onda bıil 4 aıda olardyń sany 950-ge jetti. Onyń ishinde jedel daıarlyq boıynsha is-sharalar 40-tan astam, al jaýyngerlik daıarlyq boıynsha 900-deı.

2016 jyldyń 4 aıdaǵy iri oqý-jattyǵýlar - «Aıbalta» jáne «Qarataý». «Aıbalta» jedel-taktıkalyq komandalyq-shtabtyq oqý-jattyǵýy osy jyldyń aqpanynda ótti. Oqý-jattyǵý ótken jerge birneshe kún boıy barlyq óńirlik qolbasshylyqtardyń áskerleri tartyldy.

Dalalyq mashyqty arttyrý úshin áskerler quramdastyrylǵan tásilmen 2- 4 myń shaqyrymǵa deıingi beıtanys polıgondarǵa bir jerden ekinshi jerge jóneltildi jáne Úsharal jedel áýeaılaǵyna jaýyngerlik avıatsııa qaıta ornalastyrylyp, «Shyǵys» ÓńQ «Shyǵys» polıgonynda shoǵyrlandyryldy.

«Aıbalta-2016» oqý-jattyǵýynyń erekshelikteri áskerlerdiń dalalyq daǵdysyn shyńdaý. Kúrdeli qysqy jaǵdaıda bólimder men bólimshelerdi tolyq óristete otyryp, ótkizildi. Oqý-jattyǵýǵa barlyǵy qytymyr klımattyq jaǵdaıda tabandylyǵy men tózimdiligin kórsete alǵan 5 myńǵa jýyq áskerı qyzmetshi tartyldy. Barlyq kezeń boıy 1500-den asa qarý-jaraq pen áskerı tehnıka jáne shamamen 30 avıatsııalyq tehnıka is-qımyldardyń úılesimdiligi men barlyq oqý-jattyǵý nıetiniń iske asyrylýyn pysyqtady.

Uzaq ýaqyttan beri oqý-jattyǵý alǵash ret qysqy ýaqytta jaýyngerlikke jaqyndatylǵan jaǵdaıda ótti.

QR QK Joǵarǵy Bas Qolbasshysynyń tapsyrmasy boıynsha «Batys» óńirlik qolbasshylyǵynyń áskerlerinde sáýir aıynda «Qarataý-2016» aýqymdy oqý-jattyǵýy ótti. Bul oqý-jattyǵýǵa «Batys» jáne «Ońtústik» ÓńQ áskerleri qolbasshysy basqarmalarynyń jeke quramy, 25744, 86717, 30238, 75488 áskerı bólimderiniń áskerı qyzmetshileri, sondaı-aq UQK Shekara qyzmeti men QR ІІM Ulttyq ulanynyń bólimsheleri tartyldy.

Mundaı oqý-jattyǵýdyń ótkizilýi jeke quramnyń jaýyngerlik is-qımyldardy júrgizý mashyǵyn, sondaı-aq dene tózimdiligin jáne áskerlerdi úlken qashyqtyqtarǵa bir jerden ekinshi jerge jóneltýdi pysyqtaýǵa baǵyttalǵan. «Qarataý-2016» oqý-jattyǵýyna 7 myńnan asa áskerı qyzmetshi tartyldy. Jalpy alǵanda, shamamen 2 500 qarý-jaraq pen áskerı tehnıka, onyń ishinde QR QK Áýe qorǵanysy kúshteri men QR Shekara qyzmetiniń 70-ten asa avıatsııalyq tehnıkasy tartyldy.