Qazaqstanda 4,6 myńnan astam adamnyń jeke kýáligi bolmaǵan
NUR-SULTAN. QazAqparat – Elimizde jeke kýáliksiz ómir súrip júrgen 4686 adam anyqtaldy, dep habarlaıdy QazAqparat tilshisi.
«Bizdiń mınıstrlik ótken jyldyń qazan aıynan bastap Úkimettik emes uıymdar, adam quqyǵy jáne zańdylyqty saqtaý týraly halyqaralyq bıýro jáne «Sezim – áıelder bastamasy» quqyq ortalyǵymen birlesip, el aýmaǵynda jeke qujatsyz júrgen azamattardy anyqtaý maqsatynda keń aýqymdy aktsııa uıymdastyrdy. Aktsııanyń nátıjesinde Qazaqstanda qujatsyz 4686 adam anyqtaldy. Olar negizinen Almaty, Qaraǵandy, Túrkistan, Aqmola jáne Jambyl oblystarynda turǵan. Búginde qujatsyz osy azamattardyń 3408-ne jeke kýálik berildi. Al qalǵan 1278 adamdy qujattandyrý jumysy júrip jatyr», - dedi QR ІІM Kóshi-qon komıteti tóraǵasynyń orynbasary Sabyrjan Seıitjanov Ortalyq kommýnıkatsııalar qyzmetinde ótken baspasóz máslıhatynda.
Sondaı-aq, Kóshi-qon komıtetiniń ókili qujatsyz júrgenderge jeke kýálikti qalaı alýǵa bolatyndyǵy týraly keńesimen bólisti.
«Adamdar ómirdegi túrli jaǵdaılardyń saldarynan qujatsyz qalýy múmkin. Qandaı jaǵdaıda bolmasyn kez kelgen adamnyń jeke kýáligi bolýy tıis. Onsyz eshqandaı kómek, qoldaý ala almaıdy, tipti jumysqa da tura almaıdy. Demek, qujatsyz adam ne isteý kerek? Elimizdiń barlyq aımaǵynda Kóshi-qon komıtetiniń bólimsheleri bar. Aldymen sol jerge baryp, azamat óziniń qujatsyz júrgenin aıtý kerek. Sol jerdegi mamandar ol azamattyń mártebesin anyqtap, ýaqytsha qujat bere alady. Sodan soń azamatqa qatysty tolyq jaǵdaı anyqtalyp, onyń nelikten qujatsyz júrgeni anyqtalǵan soń resmı túrde Qazaqstannyń azamaty ekenin dáleldeıtin jeke kýálik beriledi», - deıdi ol.
