Qazaqstanda 4 429 aýyl ortalyqtandyrylǵan sýmen qamtylǵan

NUR-SULTAN. QazAqparat – Qazaqstanda 4 429 aýyl ortalyqtandyrylǵan sýmen qamtylǵan. Bul týraly Májilistegi Úkimet saǵatynda «Aýyl — El besigi» jobasyn talqylaý kezinde Ulttyq ekonomıka mınıstri Álibek Qýantyrov málim etti, dep habarlaıdy QazAqparat tilshisi.

«2022 jylǵy 1 qańtardaǵy jaǵdaı boıynsha respýblıkada 6 293 aýyldy eldi meken bar, olarda 7,8 mln aýyl turǵyny turady. Bul rette, 4 429 aýyl ortalyqtandyrylǵan sýmen qamtylǵan, 5 535 aýylda – aýdan ortalyǵyna asfalttalǵan joldar, 3 738 aýylda – mádenıet nysandary, 4 553 aýylda – bilim berý nysandary bar, 5 195 aýylda – densaýlyq saqtaý obektileri, 4 023 aýylda – sport nysandary bar», - dedi Á. Qýantyrov.

Onyń aıýtynsha, 2019-2021 jyldarǵa 206 mlrd teńge bólinip, 2,6 myńnan astam joba júzege asyryldy.

«Bul 250 turǵyn úı-kommýnaldyq, 676 áleýmettik ınfraqurylym nysanyn jáne 1,7 myńnan astam kólik ınfraqurylymy nysandaryn jańǵyrtýǵa múmkindik berdi. Jalpy, 2021 jyly «Aýyl – El besigin» júzege asyrýǵa respýblıkalyq jáne jergilikti bıýdjetten 126,3 mlrd teńge bólindi. Bul qarajatqa 1 myńnan astam joba júzege asyrylyp, 480 aýyldyń ınfraqurylymy jańǵyrtyldy», - dedi mınıstr.

Budan buryn habarlanǵandaı, «Aýyl – El besigi» jobasy aıasynda damý áleýeti bar 3,5 myń aýyl tańdaldy .

2019 jyly elimizde «Aýyl – El besigi» baǵdarlamasy iske asyryla bastady .

Onyń basty maqsaty — aýyldaǵy adamdardyń ómirin jaqsartý. Jol qurylysy, sýmen qamtamasyz etý, densaýlyq saqtaý, bilim berý, mádenıet, sport nysandaryn qaıta jańartý jáne jańa nysandar salý, jumys oryndaryn qurý — osynyń barlyǵy atalǵan baǵdarlamany iske asyrýdy kózdeıdi.