Qazaqstanda 4 288 shaǵyn jınaqy mektep bar - J.Túımebaev
ASTANA. Qarashanyń 30-y. QazAqparat /Quralaı Orynbekqyzy/ - Qazaqstandyq mektepterdiń 56,6 paıyzy nemese 4 288-i - shaǵyn jınaqy mektepter.
Bularda 405 myń bala oqıdy. Búgin elordanyń №60 mektebinde ótip jatqan respýblıkalyq semınar-keńes barysynda QR Bilim jáne ǵylym mınıstri Janseıit Túımebaev osylaı aıtty, dep habarlaıdy QazAqparat tilshisi.
«Shaǵyn jınaqy mektepterdiń 18 paıyzy kúrdeli jóndeý jumystaryn talap etedi, al 2 paıyzy - tipti apattyq jaǵdaıda. Mektepterdiń kóbisi pándik kabınettermen qamtamasyz etilmegen. Máselen, onda fızıka, hımııa, bıologııa kabınetteri joq. Qazirgi zamanǵa laıyqty jabdyqtalǵan hımııa kabınetteri osyndaı mektepterdiń 12 paıyzynda, fızıka kabıneti - 30, al lıngafondyq, mýltımedııalyq kabınetter 16 paıyzynda ǵana bar», dep atap ótti semınar-keńes barysynda mınıstr. J.Túımebaevtyń aıtýynsha, 948 mektepte ashana joq. «Sońǵy 3 jylda shaǵyn jınaqy mektepter 143-ke nemese 3,3 paıyzǵa, al oqýshylar sany 27 myńnan astamǵa nemese 6,3 paıyzǵa azaıdy», dedi ol.
Sonymen qatar, mınıstr aýyldyq jerlerdegi osyndaı mektepterdiń jaǵdaıyna da toqtalyp ótti. «Shaǵyn jınaqy mektepterdiń kóbisi, ıaǵnı 96,5 paıyzy aýyldyq eldi mekenderde ornalasqan. Aýyldaǵy shaǵyn jınaqy mektepter bilim berýden basqa, sondaı-aq keshendi áleýmettik-ekonomıkalyq máselelerin sheshedi. Bular - halyqtyń mádenı deńgeıiniń kóterilýine, demografııalyq problemalardy sheshýge, ekonomıkanyń agrarlyq sektoryn damytýǵa kómektesý. Atalmysh faktorlar, ásirese aýyldaǵy shaǵyn jınaqy mektepterdiń mańyzdylyǵyn arttyrady. Shaǵyn jınaqy mektepterge barlyq qajetti qazirgi zaman resýrstaryn tartý kerek. Búginde bul mektepterde 2 850 ustaz qyzmet etedi», dep atap ótti J.Túımebaev.
