Qazaqstanda 4,2 mıllıon adam temeki shegedi
ASTANA. 19 qarasha. QazAqparat /Jasulan Amanbaıuly/ - Qazaqstanda «Jeńil jáne erkin tynys al» atty ulttyq sharasy ótýde. Shara onynshy jyl qatarynan Dúnıejúzilik obstrýktıvti ókpe aýrýlarymen kúres kúnine jáne Halyqaralyq temeki shegýden bas tartý kúnine arnalyp uıymdastyrylyp keledi.
Búgin soǵan oraı salamatty ómir saltyn qalyptastyrý ortalyǵynyń uıymdastyrýymen elordada sozylmaly obstrýktıvti ókpe aýrýlarynyń (SOÓA) aldyn alýǵa arnalǵan dóńgelek ústel májilisi ótti.
«Bul shara qoǵam men dárigerlerdiń nazaryn sozylmaly obstrýktıvti qolqa aýrýlaryna aýdartý úshin jasalýda. Sebebi bul dertke shaldyǵatyndardyń sany qant dıabetimen aýyratyndardyń sanynan úsh ese kóp. Al ony emdeý ókpe demikpesin emdeýge ketetin shyǵynnan áldeqaıda kóp shyǵyndy talap etedi», deıdi Astana qalasy Densaýlyq saqtaý basqarmasynyń bas terapevt mamany Meıramgúl Saǵyndyqova.
SOÓA-nyń adamǵa saldary óte aýyr. Dert ókpe nemese qolqa beıdaýasyna ulasyp ketip jatady. «Byltyr Qazaqstanda ókpe beıdaýasy qaterli isik aýrýlarynyń ishinde birinshi orynda boldy. Bıylǵy jyly ol ekinshi orynǵa tústi. Degenmen, ólim-jitim boıynsha ókpeniń qaterli isigi birinshi oryndy bergen emes», dep atap kórsetti Astana qalasy Onkologııalyq dıspanseriniń bas dárigeri Muhtar Tóleýtaev.
Onyń basty sebepkeri - temeki shegý ádeti. Resmı derekterge súıensek, elde árbir 3-shi azamat temeki shegedi. Olardyń ishinde árbir 10-shy SOÓA shaldyqqan. Al Álemdik statıstıkanyń málimetteri boıynsha, temeki shegetinderdiń 82 paıyzy ókpe beıdaýasyna dýshar bolady. SOÓA derti álemdegi ólim-jitimniń 4-shi sebebi bolyp tabylady.
«Tórt jyl saıyn Qazaqstanda temeki shegýshilerdiń statıstıkasy jasalady. Taldaý kórsetkenindeı, 4 jyl aralyǵynda shylymǵa áýestengenderdiń sany 4 paıyzǵa ósip otyrady. Temeki epıdemııasynyń damýy úshin bul asa joǵary ekpin. Qazir elde halyqtyń úshten biri, ıaǵnı 4,2 mıllıon adam temeki shegedi», dedi «Temeki tútininen taza Qazaqstan úshin» atty ulttyq koalıtsııanyń dırektory Jámılá Sadyqova.
Astana qalalyq máslıhatynyń sheshimimen 2011-2013 jyldarǵa arnalǵan jalpy bıýdjeti 60 mln. teńgeni quraıtyn «Astana - temeki tútininen arylǵan qala» atty baǵdarlama maquldandy.
