Qazaqstanda 3D sot saraptamasy engizilýi múmkin
NUR-SULTAN. QazAqparat - Jyl saıyn Qazaqstanda 30 myńǵa jýyq aýtopsııa júrgiziledi, dep habarlaıdy QazAqparat M.S. Nárikbaev atyndaǵy KAZGıÝÝ enıversıtetiniń baspasóz qyzmetine silteme jasap.
Bul týraly sot-medıtsınalyq sarapshy Frants Galıtskıı QR keıbir zańnamalyq aktilerine sot-saraptama qyzmeti máseleleri boıynsha ózgerister men tolyqtyrýlar engizý týraly» zań jobasyn talqylaý jónindegi onlaın-dóńgelek ústel barysynda aıtty.
Onyń aıtýynsha, bul kórsetkish elimizdiń sot-saraptamalyq quramy úshin aıtarlyqtaı júkteme jáne birqatar aımaqtarda kadrlardyń jetispeýshiligi baıqalady. «Aýtopsııa, ıaǵnı máıitti soıý sanyn azaıtsaq, maman jetispeýshiligi máselesin sheshemiz», – deıdi dáriger Galıtskıı.
Dúnıejúzilik banktiń «Sot tóreligi sektoryn ınstıtýtsıonaldyq nyǵaıtý – sot saraptamasyn kúsheıtý» jobasynyń úılestirýshisi, M.S. Nárikbaev atyndaǵy KAZGıÝÝ Ýnıversıtetiniń provosty Sergeı Penniń pikirinshe, vırtýaldy 3D-aýtopsııa dástúrli aýtopsııaǵa balama bola alady.
«Qazaqstan Respýblıkasynyń Ádilet mınıstrligi eksperımenttik shara retinde tomograftyń kómegimen 3D-aýtopsııany engizýdi josparlap otyr. Tehnıkalyq turǵydan alsaq shyǵyny az emes, sondyqtan elimizdiń barlyq óńirinde birden qoldaný qıynǵa soǵady. 3D aýtopsııa kezinde denege pyshaq tımeı adam óliminiń negizgi sebebi anyqtalady. Zertteý barysynda onyń ishki aǵzalaryna zaqym kelmeıdi», – dep habarlady Sergeı Pen onlaın dóńgelek ústelde.
Májiliske engizilgen zań jobasy Qazaqstannyń sot saraptamalyq qyzmetin reformalaý jolyndaǵy úlken qadam ekenin eskere kele, QR Ádilet mınıstrligi Saraptama qyzmetin uıymdastyrý departamentiniń dırektory Tımýr Isabekov 3D aýtopsııa jeke sot-saraptama qyzmetiniń júıesin neǵurlym tıimdi etetinin atap ótti.
