Qazaqstanda 385 mamandyq joıylyp barady — mamandyqtar atlasy

ASTANA. KAZINFORM — Ǵylym jáne joǵary bilim mınıstrligi ázirlegen mamandyqtar atlasynda 1 000-nan astam jańa mamandyq anyqtalǵan. Sondaı-aq, 540-tan astam mamandyq transformatsııaǵa ushyrap, 385-ten astam kásiptiń joıylyp bara jatqany anyqtalǵan.

Ǵylym jáne joǵary bilim mınıstrli Gúlzat Kóbenovanyń aıtýynsha, jedel tehnologııalyq jáne ekonomıkalyq ózgerister jaǵdaıynda bilim berý júıesi men eńbek naryǵynyń qajettilikterin úılestirý úshin Jańa mamandyqtar atlastary ázirlendi. 

Atlas – jaı anyqtamalyq emes, navıgatsııalyq qural: ol qandaı mamandyqtardyń paıda bolyp jatqanyn, transformatsııalanatynyn nemese joıylyp bara jatqanyn kórsetedi. Álemde mundaı quraldardy EO, Sıngapýr jáne Kanada kásiptik baǵdar berý jáne bilim berýdi josparlaý úshin qoldanady.

– Joba elimizdiń barlyq oblystaryn qamtydy. Osylaısha 20 óńirlik kadr qajettiligi kartasy ázirlendi, 17 forsaıt-mektep quryldy, ekonomıkanyń 27 salasy qamtyldy, 235 myń mektep oqýshysy kásibı dıagnostıkadan ótti. Osylaısha, biz bolashaq talapkerlermen oqýǵa túskenshe, erterek jumys isteı bastaımyz, bul mamandyqty sanaly túrde tańdaýǵa septigin tıgizedi, – dedi G. Kóbenova Ortalyq kommýnıkatsııalar qyzmetinde ótken brıfıngte.

Jobalaý jáne zertteý jumystary barysynda 1 000-nan astam jańa mamandyq anyqtalǵan. 540-tan astam transformatsııalanatyn mamandyq aıqyndalǵan jáne 385-ten astam joıylyp bara jatqan mamandyq tirkelgen.

– Memlekettik tapsyrysty qalyptastyrý kezinde osy derekterdi paıdalaný kadrlardy daıarlaý men eńbek naryǵynyń suranysy arasyndaǵy teńgerimsizdikti boldyrmaýǵa múmkindik beredi, – dedi Gúlzat Kóbenova.

Aıta keteıik, OpenAI Qazaqstannyń 165 myń pedagogine tegin lıtsenzııa beretin boldy.