Qazaqstanda 377 km jylý jelisi jańartylady
ASTANA.KAZINFORM — Qazaqstanda jylytý maýsymy aıaqtalýǵa jaqyn, onyń ornyn aýqymdy jóndeý naýqany basady. Energetıkter tozǵan kommýnıkatsııalardy jańartýǵa kirispek. Bul týraly vedomstvonyń baspasóz qyzmeti málim etti.
QR Energetıka mınıstrligi úshin jylý jelilerin aýqymdy jańǵyrtý — tozý deńgeıin tómendetýge jáne jylýmen jabdyqtaý senimdiligin arttyrýǵa baǵyttalǵan basym baǵyt bolmaq.
Búgingi tańda respýblıka boıynsha jylýmen jabdyqtaý jelileriniń jalpy uzyndyǵy 13,4 myń shaqyrymdy quraıdy.
Byltyr jylý jelilerinde 323 shaqyrymdy quraıtyn rekonstrýktsııalaý jáne kúrdeli jóndeý júrgizildi. Bul tozýdyń ortasha deńgeıin 52%-dan 50%-ǵa deıin tómendetýge, sondaı-aq halyqty jylýmen qamtamasyz etý senimdiligin ulǵaıtty.
— Bıyl 377 shaqyrym jylý jelisin kúrdeli jóndeýden ótkizý jáne jańǵyrtý josparlanǵan. Negizgi nazar jelileriniń tozý deńgeıi joǵary óńirlerge — ShQO, Qaraǵandy, Mańǵystaý, Pavlodar jáne SQO-ǵa aýdarylady, — delingen habarlamada.
Sonyń ishinde, Energetıka salasyn jańǵyrtý jónindegi ulttyq joba aıasynda 2026 jyly 130 shaqyrym jylý jelisin jańartý kózdelgen. Tutastaı alǵanda, bul keshendi jumystar jylý jelileri tozýynyń ortasha deńgeıin 48%-ǵa deıin tómendetýge jaǵdaı jasaıdy.
Jalpy, 2029 jylǵa deıin ulttyq joba aıasynda elimiz boıynsha 1,6 myń shaqyrym jylý jelisin jańartý qarastyrylǵan, bul tozý deńgeıin 42%-ǵa deıin azaıtpaq.
Aıta keterligi, QR Energetıka mınıstrliginiń Memlekettik energetıkalyq qadaǵalaý jáne baqylaý komıteti jylý ınfraqurylymynyń jaı-kúıi men jańǵyrtylýyna turaqty baqylaý júrgizedi. Aǵymdaǵy jyldyń birinshi toqsanynda vedomstvo ákimdiktermen birlesip, jylý óndirýshi jáne jylý tasymaldaýshy uıymdardyń 2026 jylǵa arnalǵan jóndeý baǵdarlamalaryna revızııa júrgizdi.
Buǵan deıin, Qostanaı oblysynyń jylý jelilerin rekonstrýktsııalaýǵa 2,2 mlrd teńge bólingenin jazdyq.