Qazaqstanda 360-tan asa tálimger jetim balalarǵa ómirlik jol siltep júr

ASTANA. KAZINFORM — Búgingi tańda respýblıka boıynsha 20 óńirde 360-tan astam azamat tálimger atandy, dep habarlaıdy Oqý-aǵartý mınıstrliginiń baspasóz qyzmeti.

Qazaqstanda jetim balalar men ata-anasynyń qamqorlyǵynsyz qalǵan balalarǵa jeke qoldaý kórsetýge baǵyttalǵan tálimgerlik ınstıtýty damyp keledi. 

Tálimgerlik aqysyz negizde júzege asyrylady jáne ata-anasynyń qamqorlyǵynsyz qalǵan, balalar úıinde tárbıelenip jatqan 10 jastan asqan balalardy qamtıdy. Jobanyń maqsaty — balalardyń áleýmettenýine yqpal etý jáne olardy óz betinshe ómir súrýge daıyndaý.

Qazaqstanda tálimgerlerge mindetti sertıfıkattaý tártibi engizilgen. Tálimger bolǵysy keletin azamattar tálimgerlik uıymdarynda oqýdan ótip, biliktiligin rastaıtyn sertıfıkat alady. Mindetti oqytý tálimgerlerdiń qajetti bilim men daǵdyǵa ıe bolyp, balalarǵa tıimdi qoldaý kórsetýine múmkindik beredi.

— Tálimger — bul balanyń janynan tabylyp, oǵan jol kórsetetin adam. Árkim tálimger bola bermeıdi. Bul — úlken júrek pen adal nıetti, jaýapkershilikti qajet etetin is. Sol sebepti biz oqytý men sertıfıkattaýdy engizdik. Balalarǵa shynymen qamqor bola alatyn, senimdi adamdar ǵana tálimger bolýy tıis, — dep atap ótti QR Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.

Aıta keteıik, tálimgerlik ınstıtýty Qazaqstanda 2024 jyly zańnamalyq túrde engizildi.

Budan buryn jetim balalarǵa tálimger bolǵysy keletinder mindetti oqytýdan ótetini habarlanǵan edi.