Qazaqstanda 360 myńnan astam qyz bala adam papılomasy vırýsyna vaktsına aldy
ASTANA. KAZINFORM - Qazaqstanda adam papılloma vırýsyna (APV) qarsy vaktsınanyń alǵashqy dozasyn 360 myńnan astam qyz bala aldy. 2026 jyly memlekettik ımmýndaý baǵdarlamasy 14–17 jas aralyǵyndaǵy qyzdardy da qamtý arqyly keńeıtildi, dep habarlaıdy QR Densaýlyq saqtaý mınıstrliginiń baspasóz qyzmeti.
2024 jylǵy qyrkúıekten bastap 2026 jylǵy 12 qazandy qosa alǵanda 11–13 jas aralyǵyndaǵy 301,7 myńnan astam qyz bala vaktsınanyń birinshi dozasyn, al 196,6 myńy ekinshi dozasyn aldy.
2026 jylǵy mamyrdan bastap baǵdarlamaǵa 14–17 jas aralyǵyndaǵy qyzdar da qosyldy. Bul jas tobynda shamamen 58,6 myń qyz bala vaktsınanyń birinshi dozasyn, 19,1 myńy ekinshi dozasyn aldy.
Vaktsınatsııalaý ata-analardyń nemese zańdy ókilderdiń kelisimimen, erikti negizde jáne memleket esebinen júrgiziledi.
APV-ǵa qarsy egý jatyr moıny obyry jaǵdaılarynyń basym bóligin týdyratyn vırýstyń eń qaýipti tıpterinen qorǵaıdy jáne bolashaqta aýrýdyń damý qaýpin aıtarlyqtaı tómendetýge kómektesedi.
Monıtorıngtiń derekteri boıynsha egilgen qyz balalardyń arasynda ımmýndaýdan keıin qolaısyz kórinister tirkelmegen.
-Baǵdarlamanyń keńeıýi Qazaqstandaǵy kóbirek otbasyna zamanaýı profılaktıkalyq sharalardyń qoljetimdi bolýyna múmkindik beredi. Qosymsha aqparatty tirkelgen jeri boıynsha emhanadan alýǵa bolady,-delingen habarlamada.
Osyǵan deıin habarlaǵanymyzdaı, 2027 jyly Qazaqstanda densaýlyq saqtaý salasyna 2,5 trln teńge bólý kózdelgen. Bul qarajat tegin medıtsınalyq kómektiń kepildik berilgen kólemine, dári-dármekpen qamtamasyz etýge jáne medıtsınalyq saqtandyrýǵa kózdelgen.
